सिम्रुतुका दश पसल अनुगमन : पाँच हजार जरिवाना, दश हजार बढीको सामान नष्ट

रुकुम पश्चिमको त्रिवेणी गाउँपालिका –२ स्थित सिम्रुतु बजारका विभिन्न दश वटा पसल अनुगमन गरिएको छ । 

आईतबार जिल्ला प्रशासन कार्यालयको अगुवाईमा भएको संयुक्त बजार अनुगमन टोलीले दश वटा पसल तथा व्यवसाय अनुगमन गर्दा पाँच हजार रुपियाँ जरिवाना गरेको र दश हजार ५९४ मूल्य बराबरका सामाग्री जफत गरेर नष्ट गरेको जनाएको छ । 

सहायक प्रमुख जिल्ला अधिकारी एवम् बजार अनुगमन समितिका संयोजक विनोद रेग्मीको नेतृत्वमा गरिएको अनुगमनको क्रममा एक चाउमिन उद्योगलाई तालाबन्दी गरिएको छ । सहायक प्रमुख जिल्ला अधिकारी रेग्मीले अनुगमनको क्रममा आवश्यक प्रक्रिया पुरा नगरेको एक पसललाई पाँच हजार जरिवाना गरिएको र पाँच वटा पसलबाट अवैध सामाग्रीहरु जफत गरिएको जानकारी दिनुभयो । म्याद गुज्रेका सामाग्रीहरु जफत गरेर नष्ट गरिएको हो । 

दश वटा पसल अनुगमन दर्ता अधिकांसमा मूल्य सूचि नरहेको, मापदण्ड अनुसारका कागजात नरहेको, केहि पसलमा म्याद गुज्रेका सामान भेटिएको, सरसफाईको अभाव रहेको, मुल्य अभिबृद्धि कर नम्वर तथा होडिङग बोर्ड नराखिएको पाईएको सहायक प्रजिअ रेग्मीले जनाउनुभयो । 

उद्योग तथा उपभोक्ता हित संरक्षण कार्यालयका प्रमुख रमेश ओलीले मापदण्ड पुरा नगरेका व्यवसायीहरुलाई प्रक्रिया पुरा गर्न सुझाव दिईएको बताउनुभयो । उहाँका अनुसार कालोबजारी रोक्न, कानूनी व्यवस्था पालना गराउन, उपभोक्ताहरुलाई ठगिनबाट जोगाउनको लागि संयुक्त बजार अनुगमन गर्ने गरिएको छ । 

अनुगमन टोलीले सिम्रुतुमा रहेका ओली एग्रोभेट एण्ड पोल्ट्री फिट तथा खुद्रा पसल, हरि बिक्रम ईन्टरप्राइजेज, माया होटेल, त्रिवेणी मदिरा स्टोर, बर्षा स्टोर, न्यू तारा एग्रोभेट सेन्टर, रोशनी ईन्टरप्राईजेज, ओली मेडिकल स्टोर, मंगल हेल्थ केयर र त्रिवेणी चाउमिन उद्योगको अनुगमन गरेको हो । 

अनुगमनमा त्रिवेणी गाउँपालिकाका अध्यक्ष गणेश कुमार केसी, सहायक प्रमुख जिल्ला अधिकारी विनोद रेग्मी, उद्योग तथा उपभोक्ता हित संरक्षण कार्यालयका प्रमुख रमेश ओली, स्वास्थ्य सेवा कार्यालय, जिल्ला प्रहरी कार्यालय, रुकुम उद्योग वाणिज्य संघ लगायका निकायका प्रमुख एवम् प्रतिनिधिहरुको सहभागिता रहेको थियो ।