रुकुम पूर्वका तीन गाउँपालिकामा १३ करोड बढी बेरुजु

रुकुम पूर्वका तीन गाउँपालिकाको बेरुजु रकम  १३ करोड बढी देखिएको छ । 

महालेखा परिक्षकको कार्यालयले मंगलबार सार्वजनिक गरेको ६२ औं वार्षिक प्रतिवेदन अनुसार आर्थिक वर्ष ०८०/०८१ मा यहाँका स्थानीय तहको बेरुजु रकम १३ करोड तीन लाख ७२ हजार देखिएको हो । 

तीन वटै स्थानीय तहको तीन अर्ब २५ करोड ५७ हजार रकमको लेखा परिक्षण गर्दा उक्त बेरुजु देखिएको प्रतिवेदनमा उल्लेख छ । महालेखाको प्रतिवेदन अनुसार सबैभन्दा बढी बेरुजु रकम पुथा उत्तरगंगा गाउँपालिकाको रहेको छ । पुथामा पाँच करोड १६ लाख ८९ हजार अर्थात ४.६७ प्रतिशत रकम बेरुजु देखिएको हो । यहाँ एक अर्ब १० करोड ७५ लाख ९२ हजार रकमको लेखा परिक्षण गरिएको थियो । 

त्यसैगरी सिस्ने गाउँपालिकाको बेरुजु रकम चार करोड ७० लाख ६ हजार अर्थात ४.३५ प्रतिशत देखिएको छ । सिस्नेमा एक अर्ब आठ करोड १४ लाख ९९ हजार रुपियाँको लेखापरिक्षण गरिएको थियो ।

जिल्लाको भुमे गाउँपालिकामा भने सबैभन्दा कम अर्थात २.९९ प्रतिशत रकम बेरुजु देखिएको छ । यहाँ तीन करोड १६ लाख ७७ हजार रकम बेरुजु देखिएको छ । भुमेमा एक अर्ब ६ करोड नौ लाख ६६ हजार रकमको लेखा परिक्षण गरिएको प्रतिवेदनमा उल्लेख छ । 

प्रचलित कानुन बमोजिम रित नपु¥याई, अनियमित वा बेमनासिब तरिकाले आर्थिक कारोबार गरेको बेरुजु रकमलाई बेरुजुमा उल्लेख गरिन्छ ।