मुसिकोटमा अर्गानिक कृषि मार्ट सञ्चालन

रुकुम पश्चिमको जिल्ला सदरमुकाम मुसिकोटमा अर्गानिक कृषि मार्ट सञ्चालन भएको छ । मुसिकोट नगरपालिका –१ खलङगा बजारमा ‘मुसिकोट कृषि उद्योगको अर्गानिक कृषि मार्ट’ सञ्चालनमा आएको हो । 

मार्टको एक कार्यक्रमका बिच सोमबार मुसिकोट नगरपालिका प्रमुख महेन्द्र केसीले उद्घाटन गर्नुभयो । मार्टको उद्घाटन गर्नुहुँदै नगर प्रमुख केसीले स्थानीय उत्पादनको बजारीकरणमा सहजिकरण हुने विश्वास गर्नुभयो । उहाँले स्वास्थ्यको हिसाबले समेत अत्यावश्यक रहेका अर्गानिक कृषि उपजहरु संकलन गरेर मार्टले नमूना काम गर्नुपर्ने बताउनुभयो । 

मार्टका सञ्चालक रबिन्द्र कुमार बिष्टले रासायनिक र बिषादीविहिन सबै खालका खाद्य समाग्रीहरु मार्टबाट बिक्रि वितरण हुने जानकारी दिनुभयो । करिब १३ लाखको लगानीमा मार्ट सञ्चालन गरिएको हो । सञ्चालक बिष्टका अनुसार कृषि उपजको बजारीकरणमा समन्वय, महिला र युवा उद्यमीलाई प्रोत्साहन, स्थानीय उत्पादनको खपत र कृषिलाई व्यवसायिकरण गर्ने उद्धेश्यका साथ अर्गानिक कृषि मार्ट सञ्चालन गरिएको हो ।  

उहाँका अनुसार मार्टबाट स्थानीय उत्पादनमा आधारिक कृषि उपजहरु र लघु उद्यमका उत्पादनहरु बिक्रि बितरण गरिनेछ । दाल, मह, घ्यु, दहि, दुध, टिमुर, भाङगो, सिमी लगायतका खाद्य समाग्रीहरु मार्टमा उपलब्ध हुनेछन् । त्यसैगरी डोका, नाङला, मुढा, अल्लो र ढाकाका कपडाहरु समेत मार्टमा पाईने सञ्चालक बिष्टले बताउनुभयो । 

अर्गानिक मार्ट सञ्चालनका लागि मुसिकोट नगरपालिकाले समेत सहयोग गरेको छ । बिष्टका अनुसार स्थानीय सरकारले मार्ट सञ्चालनको व्यवस्थापनमा अनुदान प्रदान गरेको छ । नगरपालिकाले मार्ट सञ्चालनको लागी करिब दुई वर्षको घरभाडा र तीन लाख रुपियाँ सहयोग गर्ने भएको छ ।

यसका साथै बिष्टले आफ्नो करिब दश लाख रुपियाँ लगानी गर्नुभएको छ ।  मार्टका सञ्चालक बिष्ट एक दशकदेखि कृषि क्षेत्रमा सक्रिय हुनुहुन्छ ।