रुकुम पश्चिमको आठविसकोटमा रहेको प्रभु बैंकका एक कर्मचारीले अपचलन गरेको थप एक करोड रुपियाँ पाँच दिनभित्र फिर्ता गर्ने सहमति भएको छ । आईतबार आठविसकोट नगरपालिकामा भएको सर्वपक्षिय बैठकमा फागुन २४ गतेभित्र एक करोड दुई लाख ४४ हजार नौ सय रुपियाँ फिर्ता गर्ने सहमति भएको हो । 

आठविसकोट नगरपालिका प्रमुख रबि केसीको संयोजकत्वमा भएको छलफलमा प्रभु बैंक र पीडितहरु बिच अपचलन भएको थप रकम फिर्ता गर्ने र रोक्का भएका खाताहरु  फुकुवा गर्ने सहमति भएको हो । नगर प्रमुख केसीले बैंकमा अपचलन भएको मध्य थप १५ जना सर्वसाधारण नागरिकको एक करोड दुई लाख ४४ हजार नौ सय रुपियाँ फिर्ता गर्ने सहमति भएको जानकारी दिनुभयो ।

यसका साथै रकम हिनामिना प्रकरणको छानबिनका क्रममा प्रभु बैंकका तर्फबाट रोक्का राखिएका सबै खाताहरु आजकै मितिबाट फुकुवा गर्ने निर्णय भएको समेत नगर प्रमुख केसीले बताउनुभयो । नगरपालिकाको रोहबरमा भएको सहमतिमा बैंकको तर्फबाट सिइओ रेनु प्रसाद पाण्डे लगायतले पीडितहरुलाई रकम फिर्ता गर्ने सहमती गर्नुभएको हो । फिर्ता गर्नुपर्नेमा एउटै व्यक्तिको तीस लाख सम्मको रकम रहेको छ । 

यस अघि बैंकको आठविसकोट शाखामा अपरेशन ईन्चार्ज पदमा कार्यरत निरज बिक्रम शाहले रकम अपचलन गरेको पाईएपछि बैंकले एक करोड ७२ लाख ९८ हजार रुपियाँ फिर्ता गरिसकेको छ । हालसम्म प्रभु बैंकबाट दुई करोड ७५ लाख ४२ हजार नौ सय रुपियाँ अपचलन भएको पत्ता लागेको हो । यसमध्य भूकम्पपीडितको अस्थायी आवास निर्माण गर्नको लागि आठविसकोट नगरपालिकाले लाभग्राहीको खातामा जम्मा गर्न दिएका एक करोड पाँच लाख र १४ जना ग्राहकहरुको ६७ लाख ९८ हजार रुपियाँ फिर्ता भईसकेको छ । 

रकम हिनामिना भएको गुनासोपछि बैंकका कर्णाली प्रादेशिक कार्यालय प्रमुख शरदराज तिमिल्सिना नेतृत्वको टोलीले आन्तरिक छानबिन गरेको थियो । प्रारम्भिक छानबिन गरेर बैंकले कर्मचारी शाह बिरुद्ध बैङ्किङ कसुर शिर्षकमा जिल्ला प्रहरी कार्यालयमा मुद्धा समेत दर्ता गरेको छ । ईन्चार्ज शाहले बैंकका खातावालाहरुको रकम अनाधिकृत रुपमा निकाल्ने, अन्य खातामा स्थान्तरण गर्ने गरेको आरोपसहितको मुद्धा दर्ता भएको हो ।

प्रहरीले घटनाको छानबिन भईरहेको जनाएको छ । जिल्ला प्रहरी कार्यालयका प्रमुख प्रहरी नायब उपरिक्षक नमराज भट्टराईले आरोेपी कर्मचारी शाह फरार रहेको र खोजी कार्य भईरहेको बताउनुभयो ।