सोसल मिडिया
मेरो माईलो छोरा वैदेशिक रोजगारीमा जाने क्रममा अहिले अर्को देश पुगेको छ । महिनौ भयो गन्तव्यमा नपुगेर अर्काको देशमा रोकिएको छ । हामीले ऋण कारेर, जग्गा बेचेर छोरालाई राम्रो देशमा रोजगारीको लागि पठाउन थालेका हौ ।
छोरालाई पैसा चाहिएपछि जसोतसो गरेर पैसा जम्मा गरेका थियौ । उक्त पैसा पठाउनको लागि म माघ १७ गतेका दिन राडिमा रहेको प्रभु बैंकमा गए । हाम्रो यस पालिका क्षेत्रमा यो एक मात्र बैंक हो । यहाँ सिंगो आठविसकोटवासीको कारोवार हुन्छ, पसिना र रगत साटेर कमाएको एक–एक रकम सबैले यहि बचत गर्छौ । बैंकप्रति सबैको विश्वास र भरोसा पनि रहेको हुन्छ ।
बैंकमा गएर त्यहाँका निराजन बाबू (बैंकका अपरेशन ईन्चार्ज निरज बिक्रम शाह) लाई भेटे । उहाँलाई यो पैसा आईपिएस गरेर पठाउनुछ भने । उहाँले ‘भैहाल्छ, म गर्दिन्छु’ भन्नुभयो । मैले १७ लाख रुपियाँ उहाँको टेबलमा राखिदिए । उहाँले पैसा गनेर कम्फर्म गर्नुभयो ।
आईपिएसको फाराम भर्नुभयो । मैले सहि गरे । उहाँले पनि सहि गरेर बैंकको छाप समेत हान्नुभयो । फारामको तल्लो प्रति मलाई दिनुभयो । त्यसमा कस्को, कति पैसा, कस्लाई पठाउने सुनिश्चित गरेर बैंकको छाप हानेर हस्ताक्षर समेत गरिएको छ ।
म त्यहि पर्खिरहेको थिए । उहाँले ‘नेट चलेन, दुई तीन घण्टाभित्र चल्छ, म पठाईहाल्छु, यो पैसा रिसिभ गरेको प्रमाण उता पठाईदिए हुन्छ, यहाँ बस्नुपर्दैन’ भन्नुभयो । मैले पनि बैंकले छाप हानेको, रकम बुझेको कागज लिएर निस्के ।
छोराको लागि जस्लाई पैसा पठाउनु थियो, उहाँलाई त्यो कागज पठाईदिए । आजै आउँछ भनेर खबर गरे । भोलिपल्ट अझै पैसा जम्मा भएको छैन भनेर काठमाडौबाट खबर आयो । मैले निराजनलाई पैसा अझै जम्मा गएको छैन रे, किन के भयो भनेर फोन गरे । उहाँले यताबाट भन्नुभयो, ‘हिजोदेखि सिस्टमले काम गरेको छैन, आज जम्मा गर्दिन्छु, ढुक्क हुनुस्, अब फोन गर्न पर्दैन ।’
म आज त काम होला भनेर ढुक्क भए । काठमाडौ र यता छोरालाई त्यहि अनुसारको खबर गरे । छोरा आत्तिएको थियो । पैसा नभएर अगाडि बढ्न पाईएको छैन भनेर घरमा गुनासो गरिरहेको थियो ।
शुक्रबार साँझसम्म पनि आईपिएस गरेको पैसा दिएको खातामा जम्मा भएनछ । उता छोरालाई तनाव, यता हामीलाई । छोरा अर्काको देशमा अलपत्र पर्ने हो कि भन्ने पीरमा घरमा झन् तनाव भयो ।
आईतबार निराजनको मोबाईलमा फोन गरे । उहाँले म त नेपालगञ्ज आएको छु । त्यहि गएर बैंकमा बुझ्नु, फोन गरेर तनाव नदिनु भन्नुभयो ।
म बैंकमा आएर यो कुरा भने । बैंकका अरु कर्मचारीहरुले ‘उहाँ त बिदामा जानुभएको छ, उहाँ आएपछि आफै गर्नुहुन्छ, हामीलाई पैसा दिनुभएको छैन’ भन्नुभयो । मलाई ठुलो तनाव भयो । त्यसदिन यता राम्रोसँग खान र निदाउन सकिरहेको छैन ।
अस्तिदेखि बैंकको पैसा हिनामिना गरेर निराजन फरार भएको समाचार आईरहेको छ । जानकारी र अनुमति बिनै धेरै जनाको रुपियाँ बैंकको खाताबाट निकालेको गुनासो छ । हामीलाई घरमा ठुलो सन्ताप परेको छ । उता छोराको पीर, यता ऋण, सापट गरेर निकालेको पैसा दिएर बैंककै कर्मचारी गायब !
अब हामी के कसो गर्ने हो ? त्यो पैसा पाउँला कि नपाउँला । फरार भएका भनिएका निराजन आउँलान् कि नआउलान् ? यो सम्झेर म छाँगाबाट खसेजस्तो भएको छु । परिवारमा साह्रै तनाव भएको छ ।
- (आठविसकोट नगरपालिका –१२, रुकुम पश्चिम निवासी कुसारीसँगको कुराकानीमा आधारित)
सम्बन्धित समाचार ...
