जसले व्यक्तिगत खर्च पठाएर गाउँको सडक बनाए ...

सानीभेरी गाउँपालिका वडा नम्वर ३ का युवाहरुले रकम संकलन गरेर आफ्नो गाउँको नयाँ सडक निर्माण गरेका छन् । 

रोजगारीको सिलसिलामा अमेरिकामा बस्दै आउँनु भएका मनोज ओली, मोहन ओली, बलवीर ओली, नविन प्रकाश ओली, बिक्रम ओली र लोकेन्द्र प्रकाश ओलीले गाउँको एक किलो मिटर सडक व्यक्तिगत खर्चमा निर्माण गर्नुभएको हो । 

वडाको बेल्टापुबाट भलाचौर हुँदै कमैदे – मौराखारा जोड्ने पर्यटन सडकखण्डमा उहाँहरुको सहयोगमा नयाँ ट्रयाक खोलिएको हो । उहाँहरुको सहयोगमा दुवाबारी देखि घारिल्लो भलाचौरसम्मको एक किलोमिटर बाटो नयाँ बनाईएको हो । छ जना युवाहरुले दुई लाख सात हजार रुपियाँ व्यक्तिगत रुपमा उक्त सडक निर्माणमा योगदान गर्नभुएको छ । 

नयाँ सडक बनाईएपछि यस अघि लामो दुरीमा प्रयोग हुने सडक अब छोटो भएको छ । स्थाानीय ७४ वर्षीय पलभान नकालले तन विदेशमा भएपनि मन गाउँमा भएका जिम्मेवार युवाहरुले गाउँमा बाटो ल्याएको भन्दै खुसी व्यक्त गर्नुभयो ।

गाउँमा बनेको सडकले विकास, समृद्धि र सहजता दिलाउने उहाँको भनाइ छ । सडक निर्माणसँगै गाउँमा यातायातका साधन सञ्चालन, आवतजावतमा सहजता, वस्तु तथा चौपायको ओसारपसारमा सहजता हुने आशा गरिएको छ ।  

स्थानीय युवा टंक प्रकाश पुन मगरले नयाँ सडकले गाउँवासीको समग्र दैनिकीमा परिवर्तन आउने बताउनुभयो । उहाँका अनुसार रोजगारीको लागि परदेशमा रहेका मनकारी युवाहरुको यो योगदान केवल बाटो निर्माणको लागि मात्र नभएर समाजप्रतिको जिम्मेवारी बोध र सेवाभावको उत्कृष्ट उदाहरण हो ।

यसको सहि मूल्यांकन हुने बताउँहुँदै उहाँले मनकारी दाताहरुको योगदानको उच्च प्रशंसनिय रहेको पुनले उल्लेख गर्नुभयो ।