भूकम्प प्रभावित विद्यालयमा बनाईएका सिकाई केन्द्र काटेर ‘धुजाधुजा’

रुकुम पश्चिमको एक विद्यालयमा बनाईएका अस्थायी सिकाई केन्द्र र बालमैत्री सिकाई केन्द्र काटेर धुजाधुजा पारिएको छ । सानीभेरी गाउँपालिका –१ चाईनाबगरस्थित भेरी दोभान माध्यमिक विद्यालयमा निर्माण गरिएका सिकाई केन्द्रमा अज्ञात समुहले क्षति गराएको छ । 

भूकम्पले विद्यालयका भवनहरु पूर्ण रुपमा क्षति भएपछि विद्यालयले अस्थायी सिकाई केन्द्र निर्माण गरेर पठनपाठन सुरु गरेको थियो । बिहिबार रातीको समयमा विद्यालयको प्राङगणमा बनाईका अस्थायी सिकाई केन्द्र र बालमैत्री सिकाई केन्द्र काटेर क्षति गरिएको बिद्यालयका प्रधानाध्यापक पूर्णबहादुर ओलीले जानकारी दिनुभयो । 

उहाँका अनुसार सात वटा अस्थायी सिकाई केन्द्र र एक वटा बालमैत्री स्नेही केन्द्र बनाईएका त्रिपाल र म्याट काटेर क्षति गरिएको छ । कैची तथा धारिलो हतियारको प्रयोग गरेर सिकाई केन्द्र बनाईएका त्रिपाल, प्लाष्टिक र म्याट काटेर धुजाधुजा पारिएको प्रधानाध्यापक ओलीले बताउनुभयो । 

विद्यालयका शिक्षक भूपेन्द्र ओलीले अज्ञात व्यक्ति तथा समुहले यस्तो कार्य गरेको बताउनुभयो । स्थानीय प्रहरीलाई घटनाबारे जानकारी गराईएको समेत शिक्षक ओलीले जानकारी दिनुभयो । 

भूकम्पले विद्यालय भवनहरु क्षति गरेपछि युनिसेफको सहयोगमा सिकाई निरन्तरताको लागि विद्यालयमा ती केन्द्रहरु स्थापना गरिएको थियो । 

अस्थायी सिकाई केन्द्रमा क्षति भएपछि विद्यालयको पठनपाठन प्रभावित बनेको छ । चिसो मौसममा बिद्यार्थीहरु खुला चौरमा बसिरहेका छन् । बालशिक्षा देखि कक्षा १२ सम्म पठाई हुने यस विद्यालयमा ३३६ जना विद्यार्थी रहेको विद्यालय प्रशासनले जनाएको छ ।