भोटेकोशी बाढी प्रभावितका लागि मुसिकोटले तीन लाख सहयोग गर्ने

रुकुम पश्चिमको मुसिकोट नगरपालिकाले गत भदौ १० गते रसुवाको भोटेकोसीमा आएको बाढीबाट प्रभावितहरुको लागि तीन लाख रुपियाँ सहयोग गर्ने भएको छ । 

आज बसेको नगर कार्यपालिकाको ७१ औँ बैठकले प्रधानमन्त्री दैवी प्रकोप उद्धार कोषमा तीन लाख रुपियाँ जम्मा गर्ने निर्णय गरेको हो । नगर प्रमुख महेन्द्र केसीले बाढी पीडितको उद्धार, राहत तथा पुनर्स्थापनाका लागि सो रकम सहयोग गर्ने निर्णय भएको जानकारी दिनुभयो । 

उहाँका अनुसार दुई लाख रुपियाँ नगरपालिकाले र ५०/५० हजार रुपियाँ वडा नम्वर २ र १३ ले दिने र उक्त रकम एकमुष्ठ रुपमा जम्मा गर्ने निर्णय भएको हो । बैठकले रसुवा बाढीमा परेर मृत्यु भएकाहरुप्रति श्रद्धाञ्जली व्यक्त गर्दै उक्त सहयोग गर्ने निर्णय गरेको हो । 

त्यसैगरी मुसिकोट नगरपालिकाको आन्तरिक श्रोतबाट तलब खानेगरी नियुक्त भएका करार सेवाका कर्मचारीहरुको एक दिनको तलब पनि उक्त कोषमा जम्मा गर्ने निर्णय भएको छ । 

विपद्को बेला हातेमालो गर्न र दुःखमा परेकाहरूलाई साथ दिन यो सहयोग गरिएको नगरपालिकाले जनाएको छ ।