सहिद गणेश शाहका परिवार ३२ वर्षसम्म न्यायकै पर्खाईमा 

तत्कालिन माओवादीले जनयुद्ध सुरु गर्नुअघि रुकुममा हत्या गरिएका सहिद गणेश शाहको परिवारले न्यायको आशामै ३२ वर्ष बितेको बताएका छन् ।

साबिक रुकुममा जनयुद्धको प्रथम सहिद हुनुभएका चौरजहारी नगरपालिका –११ खोलागाँउका शाहको हत्या भएको भदौ १७ गते ३२ वर्ष पुगेको छ । हालसम्म राज्यबाट राहत समेत नपाएको मृतकका परिवारले गुनासो रहेको छ ।  

शाहको ३२औं स्मृति दिवसको अवसरमा खोलागाउँमा भएको कार्यक्रममा स्वर्गीय शाहको श्रीमती तोलाकुमारी शाहले ३२ वर्षसम्म अन्याय भोगिरहेको बताउनुभयो । श्रीमान् मारिएपछि परिवारको बिचल्ली परेको बताउनुहुँदै उहाँले श्रीमान् मारेकाहरु जनयुद्धको नाममा फरार भएको, हालसम्म कारबाहि नभएको र राज्यबाट हालसम्म राहत समेत नपाएको गुनासो गर्नुभयो ।

तत्कालिन खोलागाउँ गाविस अध्यक्ष तथा जिल्ला विकास समितिका सदस्य शाह कामको सिलसिलामा जिल्ला सदरमुकाम जाँदै गर्दा २०५१ साल भदौ १७ गते सानीभेरी गाउँपालिका ९ सिम्लीको सुलिहालेमा तत्कालिन माओवादीबाट हत्या भएको थियो ।

कार्यक्रममा नेपाली काँग्रेस रुकुमपश्चिमका उपसभापति हर्कसिंह खत्रीले माओवादीले जनयुद्ध सुरु अघि चलाएको अभियानको क्रममा गणेश शाहको घाँटी रेटेर हत्या गरेको तर हालसम्म पनि न्याय नपाएको बताउनुभयो । फरक राजनीतिक आस्थाकै कारण शाहको हत्या भएको र राजनीतिक विभेदकै कारण शाहको परिवारले राहत समेत नपाएको उहाँको भनाइ छ ।

सरकार र बिद्रोही माओवादी बिच बिस्तृत शान्ती सम्झौता हुँदा २०५२ साल फाुगन १ गते यताका घटनालाई मात्रै द्वन्द्वकालिन घटना मान्ने भनेर उल्लेख गरिएपछि मृतक शाहको परिवारले राहत पाउनबाट बञ्चित भएको उहाँले बताउनुभयो । उपसभापति खत्रीले राज्यले राजपत्रमै सहिदको सूचिमा गणेश शाहको नाम समावेश गरेको तर सहिदका परिवारलाई दिईनुपर्ने राहत रकम नदिएको उल्लेख गर्नुभयो । ३२ वर्षसम्म सहिद परिवार अन्यायमा बाँचिरहेको उहाँले बताउनुभयो । 

कार्यक्रममा नेपाली काँग्रेसका चौरजहारी नगरसभापति प्रेमबहादुर ओलीले मान्छे मारेर विचार नमर्ने बताउनुभयो । गणेश शाहको विचार र बाटो असल र अमर रहेको उल्लेख गर्नुहुँदै उहाँले हत्याको राजनीती अपराधिक मानसिकताको उपज भएको बताउनुभयो । ओलीले हत्या र हिंसाको बाटोले कसैको पनि भलो नहुने र विचार मार्न नसकिने बताउनुभयो ।

वैचारिक आस्थाकै आधारमा हत्या गरिएका गणेश शाहको परिवार ३२ वर्षसम्म न्यायको खोजीमा भौतारिनुपर्ने अवस्था आउनु भनेको कानूनी राज्य माथिको उपहास भएको उहाँको भनाई छ । 

नेपाली काँग्रेस चौरजहारी नगरपालिका वडा नम्वर ११ का सभापति खिमबहादुर ओलीले हरेक वर्ष शाहको स्मृति दिवसका अवसरमा विभिन्न कार्यक्रम गरिरहेको जनाउनुभयो ।