तिल्चा खोलाले बगाएका सन्यासी अझै भेटिएनन्

रुकुम पश्चिममा खोलाले बगाएका एक युवा अहिलेसम्म बेपत्ता रहेका छन् । जिल्लाको मुसिकोट नगरपालिका ४ निवासी १८ वर्षीय प्रशान्त सन्यासी अझैसम्म फेला नपरेको प्रहरीले जनाएको छ । 

जिल्ला प्रहरी कार्यालयका प्रमुख प्रहरी नायब उपरीक्षक (डिएसपी) बेदबहादुर पौडेलका अनुसार बाँफिकोट गाउँपालिका वडा नम्वर ३ र ४ को सिमानास्थित तिल्चा खोलाले मंगलबार दिउँसो ४ बजे सन्यासीलाई बगाएको थियो । रा.६ प. १६१८ नम्वरको मोटरसाइकलसहित दुई जनालाई खोलाले बगाएको थियो । खोलाले बगाएका मध्य चालक समेत रहेका सन्यासी हालसम्म बेपत्ता भएको उहाँले जानकारी दिनुभयो ।  

उक्त मोटरसाइकलको पछाडि सवार रामेछापको गोकुलगंगा गाउँपालिका १ निवाासी १८ वर्षीय प्रविण बस्नेतलाई भने खोलाको बिचमा रहेको ढुंगामा अड्किएको अबस्थामा उद्धार गरियको थियो । 

खोलाले बगाएका सन्यासीको खोजी भने निरन्तर भईरहेको छ । आज बिहानै देखि नेपाल प्रहरी, सशस्त्र प्रहरी र बेपत्ताका आफन्तजनहरु नदि किनारमा खोजी कार्यमा परिचालन भएका छन् । 

मुसिकोटमा रहेको न्यू मूनलाईट बोर्डिङ स्कुलमा कक्षा १२ मा अध्ययनरत सन्यासीलाई मंगलबार स्यार्पुजाने क्रममा तिल्चा खोलाले बगाएको थियो । 

बेपत्ताका परिवारजनले उनको खोजी कार्यका लागि आग्रह गरेका छन् ।