विद्युतको पोलबाट करेन्ट लागेर दुई बाख्रा मरे

तपाई, हामी विद्युतको पोलमा ढुक्कले छुन्छौ, समात्छौ । कतिपयले त पोलमा चढ्ने, पोलमा अडेश लागेर विभिन्न कार्य समेत गर्ने गरेको पाईन्छ । 

तर यी कार्यहरुले कहिलेकाँहि करेन्ट लागेर ज्यान नै जाने जोखिम हुन्छ । पोलको लाईनमा हुने खराबी, रुख वा पहिरोको कारण विद्युतको तारबाट करेन्ट लिक भएर पोलमा समेत करेन्ट प्रवाह हुने खतरा उत्तिकै हुन्छ । 

आईतबार बेलुका चौरजहारी नगरपालिका -१ को घाँरीगाउँमा यस्तै घटना घटेको छ । स्थानीय चन्द्रकला बिकका दुई बाख्रा पोलमा आएको करेन्टको कारण घटनास्थलमै मरेका छन् ।

स्थानीय यज्ञस बिष्टका अनुसार बाख्रा चर्दै जाँदा पोलमा छोईएपछि करेन्ट लागेको थियो । दुबै बाख्रालाई एकै साथ करेन्ट लागेपछि मृत्यु भएको उहाँले जानकारी दिनुभयो । भाग्यवश गोठालले सावधानी अपनाएको कारण थप क्षति हुनबाट जोगिएको छ ।

घारीगाउँ देखि मन्कोटतर्फ जाने सडक छेउको पोलमा नजिकैको बासको रुखले छाएको थियो भने विद्युत पोलमा जडान गरिएको 'स्याकल ईन्सुलेटर' टुटेको थियो । सोहि कारण पोलमा पनि करेन्द्र प्रवाह भएको बताईएको छ । 

जिल्ला प्रहरी कार्यालय रुकुम पश्चिमले जथाभावि विद्युतका पोल नछुन, खतराजन्य कार्य नगर्न, कहिकतै जोखिमपूर्ण अवस्था देखेमा सम्बन्धित कार्यालयलाई सूचना दिन आग्रह गरेको छ ।