खेलकुद कार्यक्रमको रकम बिरामीको उपचारको लागि हस्तान्तरण 

रुकुम पश्चिमको चौरजहारी नगरपालिका ११ का युवाहरुले मेलाको अवसरमा सञ्चालित खेलकुद कार्यक्रमको खर्च रकम बचत गरेर एक बिरामीको उपचारको लागि हस्तान्तरण गरेका छन् । 

वडाको नेप्टेकाँडास्थित पिपलबोट खेलमैदानमा भदौ १२ गते लाग्ने परम्परागत मेलाको अवसरमा विभिन्न खेलकुद कार्यक्रम सञ्चालन गरिएको थियो । सोहि कार्यक्रमबाट रकम बचत गरेर बिरामीको उपचारको लागि सहयोग गरिएको हो । 

प्रेसरको कारण गम्भिर बिरामी हुनुभएका नेप्टेकाँडा निवासी दलजित ओलीलाई उपचारमा सहयोग गर्ने उद्धेश्यका साथ १० हजार २५० रुपियाँ सहयोग गरिएको हो । बिरामी ओलीको श्रीमती रबी ओलीलाई घरमै पुगेर उक्त सहयोग हस्तान्तरण गरिएको हो । स्थानीय युवाहरु भिमबहादुर डाँगी, दिपेन्द्र ओली लगायतको अगुवाईमा उक्त सहयोग प्रदान गरिएको हो । 

सहयोगी दिपेन्द्र ओलीले अशक्त र आर्थिक अभावको कारण थप उपचार अभावमा घरमै थला पर्नुभएका बिरामीको उपचार सहयोगको लागि मेलाको रकम बचत गरिएको बताउनुभयो । उहाँले देश तथा विदेशमा रहनुभएका विभिन्न सहयोगी दाताहरुले मेला सञ्चालनको लागि सहयोग गरेको जानकारी दिनुभयो । 

प्रेसरको कारण ब्रेनमा समेत समस्या भएपछि नेपालगञ्जमा सामान्य उपचार गरेर घरमै थलिनुभएका बिरामीलाई थप सहयोगको आवश्यकता रहेको छ । करिब बेसाहारा अवस्थामा रहेका ओली दम्पतीले आर्थिक अभावको कारण थप उपचार गर्न नसकेर घर फर्किएको बताउनुभएको छ । 

उहाँलाई सहयोग गर्न मनकारीहरुलाई अनुरोध समेत गरिएको छ ।