सल्यानमा खोलाले बगाउँदा एक जनाकाे मृत्यु, उद्धार गरिएका एककाे अवस्था गम्भिर

सल्यानको बाफुखोलाले बगाउँदा एक जनाको मृत्यु भएको छ भने अर्का एक जना गम्भीर घाइते हुनु भएकाे छ । जिल्लाको बागचौर नगरपालिका–११ स्थित बाफुखोला तर्ने क्रममा सोमबार साँझ दुई जनालाई खोलाले बगाएको हो।

खोलाले बगाउँदा रोल्पाको गंगादेव गाउँपालिका–४ निवासी ७२ वर्षीय देउरुप डाँगीको मृत्यु भएको जिल्ला प्रहरी कार्यालय सल्यानले जनाएको छ। उहाँलाई बगेको स्थानबाट करिब ५०० मिटर तल मृत अवस्थामा फेला पारिएको प्रहरी निरीक्षक देवराज भट्टराईले जानकारी दिनुभयो।

खाेलाले बागचौर नगरपालिका–११, कुकुरगारे निवासी ४७ वर्षीय भीमबहादुर वलीलाई पनि खोलाले बगाएको थियो। उहाँलाई घटनास्थलबाट करिब ५० मिटर तल अचेत अवस्थामा उद्धार गरिएको प्रहरीले जनाएको छ। गम्भीर अवस्थामा रहेका भीमबहादुरको उपचार भइरहेको प्रहरीले जनाएको छ।

कामको सिलसिलामा पानीचौर पुग्नुभएका उनीहरू फर्किने क्रममा सोमबार साँझ करिब ७ बजे बाफुखोला तर्ने प्रयास गर्दा खोलाले बगाएको प्रहरीले जनाएको छ। घटनाबारे सोमबार साँझ करिब ८ बजे स्थानीयले प्रहरीलाई जानकारी गराएका थिए। त्यसपछि बाफुखोला प्रहरी चौकीबाट प्रहरी टोली घटनास्थलमा खटिएको थियो।