रुकुम पूर्वमा विद्युतको करेन्ट लगाएर माछा मार्दै गरेका दुई जना पक्राउ

रुकुम पूर्वको सिस्ने गाउँपालिका –८ स्थित सानोभेरी नदीमा विद्युत् करेन्ट प्रयोग गरी माछा मार्दै गरेका दुई जनालाई प्रहरीले पक्राउ गरेको छ।

जिल्ला प्रहरी कार्यालय रुकुम पूर्वका सूचना अधिकारी प्रहरी निरीक्षक लालबहादुर बिकका अनुसार स्थानीयवासीबाट सानोभेरी नदीमा करेन्ट लगाएर माछा मारिरहेको सूचना प्राप्त भएपछि अस्थायी प्रहरी पोस्ट धपेबाट प्रहरी सहायक निरीक्षक जन्मजय शाहीको कमाण्डमा चार सदस्यीय प्रहरी टोली घटनास्थलतर्फ खटिएको थियो।

प्रहरी टोलीले सिस्ने गाउँपालिका –८ निवासी २७ वर्षीय करण रावल र १९ वर्षीय गणेश बुढालाई सानो भेरी नदीमा बिजुलीको पोलबाट तार तानेर करेन्ट प्रयोग गरी माछा मार्दै गरेको अवस्थामा नियन्त्रणमा लिएको हो। उनीहरूको साथबाट करिब ५०० मिटर तार समेत बरामद गरिएको प्रहरीले जनाएको छ।

प्रहरीले पक्राउ परेका दुवै जनाविरुद्ध सम्बन्धित कसुरमा मुद्दा दर्ता गरी अदालतबाट सात दिनको म्याद थप अनुमति लिएर अनुसन्धान अघि बढाइरहेको जनाएको छ।

विद्युत् करेन्ट प्रयोग गरेर माछा मार्ने कार्यले नदी प्रणाली, जलचर तथा जैविक विविधतामा गम्भीर असर पुर्‍याउने भएकाले यस्ता गतिविधि नियन्त्रणका लागि प्रहरीले निगरानी बढाएको जनाएको छ।