जब चालकले नै जीपमा आक्रमण गरि लाखौ रकम लुट्ने गर्ने योजना बनाए ! अनि आफै फन्दामा परे ...

गत मंगलबार रुकुम पश्चिमको आठबिसकोटमा एक यात्रुबहाक जीपमा आक्रमण भई चालक तथा र यात्रु माथि कुटपिट भएको र लाखौ नगद रकम लुटपाट भएको घटनामा नयाँ तथ्य खुल्न आएको छ । 

उक्त योजनामा जीप चालककै संलग्नता रहेको जिल्ला प्रहरी कार्यालय रुकुम पश्चिमले जनाएको छ । कार्यालयका सूचना अधिकारी प्रहरी निरीक्षक हरि प्रसाद पुनका अनुसार जेठ ५ गते बेलुका साढे सात बजे आठबिसकोट नगरपालिका १ रोकाजास्थित भित्रि सडकखण्डमा राडीबजारबाट खेततर्फ जाँदै गरेको बा १३ च २९५७ नम्वरको डबल क्याप बोलेरो जीपमा आक्रमण भएको, चालक र अन्य एक यात्रु घाईते भएको, नगद रकम लुटिएको र आक्रमणकारी फरार भएको भनेर सूचना प्राप्त भएको थियो । 

उक्त जीपका चालक थिए, आठबिसकोट नगरपालिका १ फिलिङ्गे निवासी २५ वर्षीय मुकेश बिक । मुकेशले लामो समयदेखि आठबिसकोट नगरपालिकाको केन्द्र वडा नम्वर ९ को राडी बजारबाट रोकाजा हुँदै खेतसम्म जाने उक्र जीप चलाउँदै आएका थिए । 

सोही जीप मंगलबार राडीबाट झारमारे हुँदै रोकाजा खेततर्फ जाँदै थियो । जीपमा आठबिसकोट नगरपालिकामा कार्यरत नगर प्रहरी सहायक निरीक्षक खड्क बुढाले घरमा दिनु भनेर दिएको ११ लाख ३५ हजार रुपियाँ थियो । खड्क बुढाको घर पनि चालककै वडामा पर्छ । नगर प्रहरी सहायक निरीक्षक बुढाले उहाँको श्रीमतीलाई दिनु भने उक्त रकम दिएको बताईएको छ ।  

राडीबजारबाट छुटेको उक्त जीप जब झारमारेमा पुग्यो, तब चालक मुकेशले नास्ताको लागि रोके । अनि त्यहि उनले रकम लुटपाट भएको नाटक गर्ने योजना बनाए ।

प्रहरी निरीक्षक पुनले चालकसँगको सोधपुछपछि खुलेको तथ्य भन्नुभयो, “निज चालकले झारमारे भन्ने स्थानमा पुगी यात्रुलाई नास्ता खान भनेर गाडी रोकेको अवस्थामा आफ्ना केही साथीहरुलाई आफुले गाडीमा कसैको पैसा ल्याएको र सो पैसा लुटने योजना बनाए । पूर्व योजना बमोजिम चार जना केटाहरु आएर चालक माथी हातपात गरे जस्तो गरी उनको साथमा राखेका दुई वटा मोबाईल फोन र गाडी भित्र चालकको सिट नजिक रहेको झोला लिई फरार रहेको खुल्न आएको छ ।”

गाडी आठबिसकोट नगरपालिका वडा नम्वर २ तितेमिरे जंगलमा पुगेको अबस्थामा निज चालकले गाडी रोकी अवरोध गरेको बाटो खुलाउन जाँदा एक्कासी जंगलबाट चार जना ब्यक्तिहरु अनुहारमा मुकुन्डो लगाई रोकी राखेको गाडीमा प्रबेश गरी उक्त गाडीमा रहेको पैसाको झोला लिई जंगलतर्फ भागेका थिए ।  

प्रहरी निरीक्षक पुनले लुटिएको भनिएको रकम मध्ये ११ लाख ३० हजार रुपियाँ चालक मुकेश बि.क.ले राख्न लगाएको घटनास्थल नजिकैको जंगलबाट बरामद समेत गरिएको बताउनुभयो ।

घटनामा संलग्न अन्य व्यक्तिहरु भने फरार नै रहेका छन् । उनीहरुलाई प्रहरी खोजी गरिरहेको छ । चालक मुकेशलाई भने पक्राउ गरेर अनुसन्धान गरिरेको प्रहरीले जनाएको छ । घटनाको थप अनुसन्धान भईरहेको छ ।