चौरजहारी विमानस्थल : कच्ची हुँदा नियमित उडान, कालोपत्रे भएपछि बन्द 

रुकुम पश्चिमको चौरजहारी नगरपालिका –१ स्थित चौरजहारी विमानस्थल आठ वर्षदेखी पूर्णरुपमा बन्द अवस्थामा छ । वि.सं.२०२८ सालमा निर्मित यो विमानस्थलको कच्ची धावनमार्गमा नियमित उडान हुँदै आएतापनि कालोपत्रे भएपछि भने बन्द भएको छ । 

धावनमार्ग कालोपत्रे भएपछि उडान थप हुने, व्यवसायीक तथा पर्यटकीय गतिविधिहरु बढ्ने, यातायात सुविधा थप सहज हुने अपेक्षा राखेका यहाँका स्थानीयहरु वर्षौसम्म विमानस्थल बन्द हुँदा निराश भएका छन् । चौरजहारी नगरपालिका –१ का महेश गिरीले राज्यको करोडौ लगानी भएको विमानस्थल बन्द हुनु दुर्भाग्य भएको बताउनुभयो । उहाँले जडाज आउँदा चहलपहल हुने यस क्षेत्रको व्यापार व्यवसाय र चहलपहल सुनसान बनेको जानकारी दिनुभयो । 

तत्कालिन अवस्थामा रुकुम, जाजरकोट, सल्यान र डोल्पा लगायतका सर्वसाधारणको सहजताको लागि सञ्चालनमा आएको विमानस्थल बन्द हुँदा यहाँका नागरिकहरु मर्कामा परेका छन् । नयाँ शहरको रुपमा विकसित भईरहेको चौरजहारीमा रहेको विमानस्थल नै बन्द हुँदा जनताले सहज हवाई सेवा उपभोग गर्न नपाएको चौरजहारी उद्योग वाणिज्य संघका पूर्व अध्यक्ष तेजबहादुर बिष्टले बताउनुभयो ।

उहाँले जनताले सहज र सरल यात्रा खोजिरहेको बेला करोडौ सरकारी बजेट खर्चिएको बिमानस्थल बन्द हुनु लाजमर्दो रहेको बताउनुभयो । राज्यको ठुलो सम्पति उपयोगमा नआउँदा जनताले कष्ट भोगिरहेको उहाँको भनाइ छ । 

राष्ट्रिय स्वतन्त्र पार्टीका जिल्ला उपसभापति रिमप्रसाद शर्माले नियमित सञ्चालनको सम्भावना हुँदाहुँदै पनि राज्यको ध्यान पुग्न नसकेको जनाउनुभयो । निर्माण भएका संरचनाहरु उपयोग गरेर लगानीको सदुपयोग गर्नु नै प्राथमिक बिषय रहेको उहाँको भनाइ छ । कालोपत्रे भईसकेपछि यो वा त्यो बहानामा चौरजहारी विमानस्थल बन्द गरिनु गैरजिम्मेवार प्रवृति रहेको उपसभापति शर्माले बताउनुभयो । 

२०२८ सालदेखि सञ्चालनमा आएको चौरजहारी विमानस्थलमा २०७० सालदेखि नियमित जहाज आउन छोडेको हो । २०७० फागुनदेखि २०७२ भदौसम्म धावनमार्गमा कालोपत्रको काम चलेको थियो । पाँच करोड ५९ लाख ४९ हजार ९५२ रुपिँयाको लागतमा धावनमार्ग कालोपत्रे भएको थियो । त्यसपछि केहि समय अनियमित रुपमा जहाज आउजाउ गरेतापनि कोरोना महामारीपछि यो विमानस्थल पूर्ण रुपमा बन्द रहेको छ ।

तत्कालिन अवस्थामा वायु सेवा निगमको क्षेत्रीय कार्यालय नेपालगञ्जको टोलीले विमानस्थलमा रहेका महत्वपूर्ण सामाग्रीहरु उठाएर लिएको बताईन्छ । जहाजको अभाव रहेको र यात्रुको संख्या समेत कम भएको भन्दै यहाँको कार्यालय उठाईएको थियो ।