रुकुम पश्चिमका मतदान केन्द्रहरुमा तिब्र अनुगमन

निर्वाचनको मिति नजिकिदै गर्दा रुकुम पश्चिममा मतदान केन्द्रहरुको अनुगमन कार्यलाई तिब्र पारिएको छ ।

यहि फागुन २१ गते हुने प्रतिनिधि सभा सदस्य निर्वाचनका लागि तोकिएका मतदान केन्द्र तथा स्थलहरुमा मुख्य निर्वाचन अधिकृत, प्रमुख जिल्ला अधिकारी, जिल्ला निर्वाचन कार्यालय, जिल्लास्थित सुरक्षा निकायका प्रमुखसहितको टोलीले स्थलगत अनुगमन गरेको हो । 

एक मात्र प्रतिनिधि सभा निर्वाचन क्षेत्र रहेको यहाँ कुल ७६ मतदानस्थल र १४० मतदान केन्द्र निर्धारण निर्धारण गरिएको छ । जसमध्य २१ वटा मतदानस्थल भने अति संवेदनशील सूचिमा छन् । त्यसैगरी ४३ वटा मतदानस्थल संवेदनशील र १२ वटा मतदानस्थल सामान्य सूचिमा रहेका छन् । 

सम्भावित सुरक्षा चुनौती, भौगोलिक विकटता र विगतका निर्वाचन अनुभवलाई आधार मानेर ती क्षेत्रहरूलाई अति संवेदनशील श्रेणीमा राखिएको प्रमुख जिल्ला अधिकारी एवम् जिल्ला सुरक्षा समितिका प्रमुख दिनेश प्रसाद थानीले जानकारी दिनुभयो । उहाँका अनुसार सुरक्षा संवेदनशीलता वर्गीकरण गरिएका सबै मतदान केन्द्रमा अनुगमन टोली पुगिरहेको छ । 

अनुगमनको क्रममा मतदान केन्द्रको भौगोलिक बनावट तथा व्यवस्थापनको अवस्था, मतदाताहरुको पहुँच, निर्वाचन सामाग्रीहरुको उपलब्धता, मतपेटिका संकलन लगायतका बिषयलाई प्राथमिकता दिने गरिएको छ ।

यसका साथै मतदाता, स्थानीय राजनीतिक दलका प्रतिनिधिहरु, बुद्धिजीविहरु, विद्यालय व्यस्वस्थापन समितिका पदाधिकारी लगायतसँग छलफल समेत गरिने गरिएको प्रमुख जिल्ला अधिकारी थानीले जानकारी दिनुभयो । अनुगमनपश्चात मतदान केन्द्रहरुको सुरक्षा अवस्था, पहुँच मार्ग, सञ्चार सुविधा तथा आपतकालीन व्यवस्थापनको अवस्थाबारे समीक्षा हुने गरेको छ । 

जिल्ला निर्वाचन अधिकारी मोहनलाल केसीले आठबिसकोट नगरपालिका, चौरजहारी नगरपालिका, त्रिवेणी गाउँपालिका र सानीभेरी गाउँपालिकाका अधिकांस मतदान केन्द्रमा स्थलगत अनुगमन गरिएको जानकारी दिनुभयो । उहाँका अनुसार मुसीकोट नगरपालिका र बाँफिकोट गाउँपालिकाका केहि केन्द्रहरु अनुगमन गर्न बाँकि रहेका छन् ।

अनुगमनमा मुख्य निर्वाचन अधिकृत दिपेन्द्र थापा मगर, प्रमुख जिल्ला अधिकारी दिनेशप्रसाद थानी, प्रहरी नायब उपरीक्षक बेदबहादुर पौडेल, सशस्त्र प्रहरी नायब उपरीक्षक जगदिशचन्द्र हमाल, प्रमुख अनुसन्धान अधिकृत नेबबहादुर राना, जिल्ला निर्वाचन अधिकारी मोहनलाल केसी, कोष नियन्त्रक एवम् निर्वाचन आचारसंहिता अनुगमन अधिकृत गोबिन्दप्रसाद सुवेदी लगायतको टोली खटिने गरेको छ । 

जिल्लामा कुल एक लाख छ हजार ६६० मतदाता रहेका छन् । तीमध्ये ५२ हजार ३९६ महिला, ५४ हजार २६३ पुरुष र एक जना अन्य मतदाता रहेका छन् । प्रतिनिधि सभा सदस्य पदका लागि १२ जना उम्मेदवार चुनावी प्रतिस्पर्धामा रहेका छन् । 

जिल्ला सुरक्षा समितिले मतदातालाई शान्तिपूर्ण, निष्पक्ष र भयरहित वातावरणमा मतदान गर्ने सुनिश्चितता दिन सुरक्षा व्यवस्थालाई प्राथमिकतामा राखेको जनाएको छ । संवेदनशील र अति संवेदनशील मतदान स्थलमा विशेष निगरानी, नियमित गस्ती, चेकजाँच तथा आवागमन व्यवस्थापनको योजना बनाइएको छ ।