चौरजहारीमा नि:शुल्क आँखा शिविर : ७३ जनाको अप्रेशन, ५३१ जनालाई सेवा

रुकुम पश्चिमको चौरजहारी अस्पतालमा शुक्रबार देखि सुरु भएको दुईदिने निशुल्क मोतिबिन्दु शल्यक्रिया शिविर सम्पन्न भएको छ।

चौरजहारी नगरपालिकाको आयोजना, सुर्खेत आँखा अस्पतालको प्राबिधिक सहयोग, नेपाल रेडक्रस सोसाइटी चौरजहारीको समँवय तथा चौरजहारी अस्पतालको ब्यवस्थापनमा शनिबार शिविर सम्पन्न भएको हो।

चौरजहारी अस्पताल आँखा उपचार ईकाईका स्वास्थ्यकर्मी नेत्र सहायक उमेश लामिछानेका अनुसार शिविरबाट ५३१ जनाले सेवा लिएका छन् । शिविरमा मोतिबिन्दु सम्बन्धी समस्या भएका ७३ जना आँखाका बिरामीको सफल शल्यक्रिया गरिएको छ । 

शिविरमा रुकुम पश्चिम, सल्यान र जाजरकोट जिल्लाका बिरामीहरुले सेवा लिएका छन् । शल्यक्रिया बाहेकका बिरामीहरुलाई आँखा जाँच, उपचार, तथा चस्मा वितरण गरिएको सुर्खेत आँखा अस्पतालका आँखा रोग विशेषज्ञ डा. आकाँक्षा  राणाले बताउनुभयो।