त्रिवेणीमा ३२ जना विपद् प्रभावित र दीर्घ रोगीलाई तीन लाख सहयोग गरिने

• गोपाल ओली

रुकुम पश्चिमको त्रिवेणी गाउँपालिकाको विपद् व्यवस्थापन समितिको बैठक बिहिबार सम्पन्न भएको छ।

गाउँपालिका अध्यक्ष गणेश केसीको अध्यक्षतामा बसेको बैठकले चालु आर्थिक वर्षमा विपद् तथा दिर्घरोगका कारण प्रभावित ३२ जनालाई जम्मा ३ लाख ५ हजार रुपैयाँ सहयोग प्रदान गर्ने निर्णय गरेको छ। पीडितहरूको क्षति विवरण, प्रहरी मुचुल्का तथा पालिकाको कार्यविधिअनुसार अधिकतम २० हजारदेखि न्यूनतम २ हजार सम्मको आर्थिक सहायता उपलब्ध गराइने पालिकाले जनाएको छ।

बैठकले स्थानीय गुनासो सुनुवाइ समिति पनि गठन गरेको छ। समितिको संयोजकमा पालिका अध्यक्ष गणेश कुमार केसी, सह–संयोजकमा पालिका उपाध्यक्ष राजकुमारी रेउले, सदस्यमा प्रमुख प्रशासकीय अधिकृत यज्ञ बहादुर भण्डारी, प्रहरी प्रतिनिधि विजय ओली, र सदस्य–सचिवमा प्राविधिक खिम बहादुर ओली रहने निर्णय गरिएको छ। यस समितिले स्थानीय समस्याहरूको छिटो समाधान तथा सेवा प्रवाहलाई प्रभावकारी बनाउने बताईएको छ। 

त्यसैगरी, बैठकले भूकम्प प्रभावितमध्ये विस्तृत क्षति आकलन (डि–डि–ए) प्रक्रिया भई निस्सा तयार भएका व्यक्तिहरूको अद्यावधिक विवरण नआएको भन्दै आवश्यक कागजात चाँडै पठाउन जिल्ला विपद् व्यवस्थापन समितिलाई आग्रह गरेको छ। उक्त विवरणका आधारमा आवश्यक पुनर्निर्माण कार्य अघि बढाउने सकिने पालिकाले बताएको छ। 

जाडो मौसममा हुन सक्ने चिसो, आगलागी, स्वास्थ्य जोखिम लगायत सम्भावित चुनौती न्युनिकरणका उपायबारे बैठकमा विशेष छलफल गरिएको विपद् फोकल पर्सन खिम बहादुर ओलीले जानकारी दिनुभयो। उहाँका अनुसार, जोखिम कम गर्न आवश्यक पूर्वतयारी, समुदायस्तरको सचेतना, र समन्वयात्मक कार्ययोजना तत्काल लागू गरिने छ।

बैठकले समग्रमा त्रिवेणी गाउँपालिकालाई सुरक्षित, सजग र व्यवस्थित विपद् व्यवस्थापनतर्फ अघि बढाउने उद्देश्यका साथ आवश्यक निर्णयहरू गरेको जनाएको छ।