६ दिनसम्म पनि भेटिएनन् चौरजहारीस्थित भेरीमा डुबेका अन्सारी, गोताखोर टोली पनि फिर्ता

रुकुम पश्चिमको चौरजहारी नगरपालिका वडा नम्बर २ बगर स्थित भेरी नदीमा गत शुक्रवार पौडी खेल्ने क्रममा डुबेर बेपत्ता भएका १६ वर्षीय समीर अन्सारीको अवस्था ६ दिनसम्म पनि अज्ञात रहेको छ । 

लगातार प्रहरी र आफन्जनले नदि किनारमा खोजी गरेतापनि अन्सारी बेपत्ता रहेका छन् । उनी जीवित रहेको आशा कमै रहेतापनि खोजी कार्यलाई तिब्र पारिएको चौरजहारी उद्योग वाणिज्य संघका पूर्व अध्यक्ष तेजबहादुर बिष्टले जानकारी दिनुभयो । 

मंगलबारबाट तालिम प्राप्त गोताखोरसहितको टोलीले खोजी कार्य सुरु गरेतापनि केहि पत्ता नलागेको उहाँले जानकारी दिनुभयो । हिजो र आज गोताखोर टोलीले घटनास्थल आसपासको नदि क्षेत्र र अन्य सम्भावित क्षेत्रमा खोजी गरेतापनि पत्ता नलागेको उहाँले जनाउनुभयो । कर्णाली प्रदेशको सुर्खेतबाट आएको तालिम प्राप्त गोताखोरसहितको टोली आज फिर्ता भएको बताईएको छ । 

गोताखोर टोली, नेपाल प्रहरी, सशस्त्र प्रहरी बल, जनप्रतिनिधि लगायत स्थानीयवासीले बेपत्ता अन्सारीको खोजी गरेका थिए । 

गत शुक्रवार दिउँसो साथीहरूसँग पौडी खेल्न गएको बेला उनी बेपत्ता भएका थिए । चौरजहारी नगरपालिका -१ मा व्यवसाय गर्दै आउनुभएका राजु अन्सारीका १६ वर्षीय छोरा समीर चौरजहारीस्थित भ्याली पब्लिक स्कुलमा कक्षा ९ मा अध्ययनरत थिए ।

बाँकेको नेपालगन्ज उपमहानगरपालिका वडा नम्बर ६ सल्यानी बङ्गालाका स्थायी वासीन्दा अन्सारी परिवार लामो सयमयदेखि चौरजहारी  नगरपालिका १ मा व्यवसाय गर्दै आईरहेका छन् ।