रुकुम पूर्वमा अटो दुर्घटना हुँदा एउटै घरका जेठानी देउरानीको मृत्यु, चार जना घाईते

शनिबार बेलुका रुकुम पुर्वको भुमे गाउँपालिका -१ स्यावालमा अटो दुर्घटना हुँदा २ जनाको मृत्यु भएको छ । 

जिल्ला प्रहरी कार्यालय रुकुम पुर्वका अनुसार स्यावालस्थित मध्यपहाडी राजमार्ग सडकखण्डमा लुकुमबाट ब्राहताल तर्फ जादै गरेको रा १ ह ६७९७ नम्बरको अटो दुर्घटनामा एकाघरका जेठानी देउरानीको मृत्यु भएको हो भने अन्य चार जना घाईते भएका छन् । मृत्यु हुनेमा  भुमे गाउँपालिका -१ लुकुमकी ३० वर्षीया रेजिना घर्ती र २५ वर्षीया फिसोल्टी घर्ती रहेका छन् । 

दुर्घटनामा परेर चार जना घाइते भएका छन । घाइते हुनेमा लुकुमकै २६ वर्षीया प्रतीक्षा बुढा, उहाँको ११ महिनाको छोरा सुभम बुढा, २५ वर्षीया ब्युटी पुन र लुकुमकै ३ वर्षीय का सक्षम घर्ती रहेका छन् । घाइतेहरुको उद्धार गरेर उपचारको लागि जिल्ला अस्पताल रुकुमकोटमा ल्याईएको छ । 

भुमे गाउँपालिका १ का जोते घर्तीले चलाएको अटो अनियन्त्रित भइ सडकदेखि तीन सय मिटर तल खसेको प्रहरीले जनाएको छ । चालक सम्पर्कमा नरहेको बताईएको छ । प्रहरीले घटनाको अनुसन्धान भईरहेको जनाएको छ ।