यस वर्षको डिग्रे मेला कात्तिक १५ गतेबाट, मुख्यमेला १९ गते लाग्ने

रुकुम पश्चिमको मुसिकोट नगरपालिका -५ स्थित डिग्रे शाईकुमारी मन्दिर परिसरमा परम्परागत रुपमा लाग्दै आएको डिग्रे मेला यस वर्ष कात्तिक १५ गतेबाट सुरु हुने भएको छ । 

हरिबोधनी एकादशी देखी कार्तिक पुर्णिमाको  दिनसम्म गरेर पाँच दिन लाग्ने यो मेला कर्णालीकै चर्चित मेलाको रुपमा लिईन्छ ।  शाईकुमारी भगवती मन्दिर व्यवस्थापन समितीका अध्यक्ष लालबहादुर केसीका अनुसार १९ गते पुर्णिमाको दिन मुख्य मेला लाग्नेछ । 

उहाँले शाईकुमारी भगवती देवी, सिद्ध बाबा मन्दिर डिग्रेमा वैदिक कालदेखी सनातन रुपमा हरिबोधनी एकादशी देखी कार्तिक पुर्णिमाको दिन मूल पर्वको रुपमा धार्मिक परम्परा देखि पुजा, पाठ, बोका बली दिदै आएको जानकारी दिनुभयो । यस वर्ष कातिक १५ गते हरीबोधन एकादशीका दिन तुलसीको विवाहसहित शुद्ध रुपमा बिशेष पुजापाठ गरिने,  १६  गते द्धादशीका दिन पुजापाठ, बोका बली दिन सकिने, १७ गते त्रयोदशीमा पुजापाठ, बोका बली दिन सकिने अध्यक्ष केसीले बताउनुभयो ।

त्यसैगरी १८ गते चतुर्दशीका दिन  पुजापाठ , बोका बली दिन सकिने छ र रात्रिमा जागाराम बस्न सकिने छ । १९ गते पुर्णिमाको दिन पुजापाठ र मेला लाग्ने, आकर्षक नाचगान हुने र अन्न, वरदान, धन र पुत्र वरदान, टिका ग्रहणका साथ मेलामा बिशेष झाँक्रीहरु प्रस्तुत हुने, परम्परागत सगाल नाच प्रस्तु हुने अध्यक्ष केसीको भनाइ छ । 

यसका साथै मेला व्यवस्थापनका लागि मुसिकोट नगरपालिकाका प्रमुख महेन्द्र केसीको अध्यक्षतामा शुक्रबार समवन्यात्मक बैठक सम्पन्न भएको छ । बैठकले मेला व्यवस्थापनको लागि सुरक्षा तथा सवारी व्यवस्थापन, समितिले तयार गरेका नीति नियमहरुको कार्यान्वयनमा सहजिकरण लगायतका निर्णय गरेको नगर प्रमुखको सचिवालयले जानकारी गराएको छ ।

बैठकले मेला अवधिभर गाडी तथा मोटरसाईकलमा मन्दिर जाँदा मठ- बारेगौरा- डिग्रे र रावलवारा - लहराभिजाउने हुँदै डिग्रे प्रवेश गर्नुपर्ने र निस्कदा डिग्रे - भन्डारीकाँडा- सितपोखरी हुँदै जाने व्यवस्था मिलाउने निर्णय गरेको छ । 

डिग्रे मेला व्यवस्थापन समितिले समितिको समन्वय विना कुनै कार्य सञ्चालन गर्न नपाईने, मेलामा सामजीक विकृती बिसंगतीजन्य काम गर्न नपाइने, तोके बमोजिम स्टलहरु राखिने र व्यसायीले नै फोहर व्यवस्थापन गर्नुपर्ने, मन्दिर क्षेत्रमा रुख विरुवा काट्न नपाइने, मन्दिरको धारामा फोहोर फाल्न नपाईने जनाएको छ  । त्यसैगरी मेलामा भैँसी, राँगा ,कुखुरा, संगुर, बगुरको मासु र अण्डा पुर्ण रुपमा निषेध गरिएको छ ।