आमाको स्मृतिमा चौरजहारीमा लक्ष्मी–नारायण मन्दिर निर्माण 

रुकुम पश्चिमको चौरजहारी नगरपालिका –१ पुरानो बजारमा लक्ष्मी–नारायण मन्दिर निर्माण गरिएको छ ।

आमा स्वर्गीय नन्दकुमारी ओलीको सम्झनामा उहाँका छोराहरु प्रेमबहादुर ओली, थलबहादुर ओली, गोपाल ओली, भतिजा प्रेम प्रकाश ओली र श्रीमान् दिलबहादुर ओलीले मन्दिर निर्माण गर्नुभएको हो ।

समाजसेवी ओली परिवारको व्यक्तिगत लगानीमा निर्माण गरिएको मन्दिर स्वर्गीय नन्दकुमारीको बार्षिक तिथीको अवसरमा औपचारिक रुपमा उद्घाटन गरिएको छ । चौरजहारी नगरपालिका १ निवासी उहाँको गत वर्ष ८३ वर्षको उमेरमा निधन भएको थियो । 

विगतमा पनि मन्दिर रहेको यस स्थानमा पछिल्लो समय फोहोरमैला फाल्ने र सावर्जनिक स्थानको दुरुपयोग हुने कार्य भईरहेको थियो । धार्मिक आस्थाको संरक्षण र प्रवद्र्धन गर्ने, आमाको स्मृतिलाई चिरस्थायी बनाउने र सार्वजनिक स्थानको सदुपयोग गरेर सकारात्मक सन्देश प्रवाह गर्ने उद्धेश्यले मन्दिर निर्माण गरिएको स्वर्गीय नन्दकुमारीका जेठा छोरा प्रेमबहादुर ओलीले जानकारी दिनुभयो । 

स्थानीय धार्मिक तथा सांस्कृतिक आस्थाको केन्द्रका रूपमा निर्माण गरिएको उक्त मन्दिरले धार्मिक गतिविधि सञ्चालनका साथै समुदायमा आध्यात्मिक वातावरण प्रवद्र्धन गर्न सहयोग पुग्ने अपेक्षा गरिएको छ । स्वर्गीय नन्दकुमारी ओलीको सम्झनालाई चिरस्थायी बनाउने उद्देश्यले परिवारजनबाट मन्दिर निर्माण कार्य गरिएको हो । 

चौरजहारी बजारको मुख्य केन्द्रमा निर्माण भएको मन्दिरले सार्वजनिक स्थानको संरक्षण हुनुका साथै धार्मिक आस्थाको पनि सम्मान भएको छ । करिब दश लाखको लगानीमा मन्दिर भवन र मूर्ति समेत स्थापना गरिएको छ ।