चौरजहारी बसपार्क : उद्घाटन भएको दश महिनासम्म पनि सञ्चालनमा आएन 

नयाँ शहर निर्माणको क्रममा चौरजहारीमा निर्माण भएको व्यवस्थित बसपार्क निर्माण पुरा भएको महिनौसम्म प्रयोगमा आउन सकेको छैन । निर्माण सम्पन्न भएर गत पुस महिनामा नै चौरजहारी नगरपालिकालाई हस्तान्तरण गरिएको बसपार्क हालसम्म सञ्चालनमा आउन नसकेको हो । 

निर्माण भएको बसपार्क सञ्चालन र रेखदेख समेत नहुँदा लथालिङग बन्दै गईरहेको छ भने बजार क्षेत्रमा यातायातका साधनहरु अव्यवस्थित रुपमा पार्किङ हुने गरेका छन् । जसको कारण बजारको सौन्दर्यता खोसिएको छ भने ट्राफिक व्यवस्थापनमा झमेला हुने गरेको छ । 

नयाँ शहर आयोजना कार्यालय चौरजहारी रुकुम पश्चिमले निर्माण गरेको चौरजहारी बसपार्क २०८१ पुस ११ गतेका दिन चौरजहारी नगरपालिकाका प्रमुख पुष्प बादीले उद्घाटन गर्नुभएको थियो । यो बसपार्क उपयोग तथा सञ्चालनको जिम्मेवारी पनि चौरजहारी नगरपालिकाकै हो । नयाँ शहर आयोजना कार्यालयले नवनिर्मित बसपार्क उद्घाटनकै दिन नगरपालिकालाई हस्तान्तरण गरिसकेको जनाएको छ ।

बसपार्क निर्माणको लागि नयाँ शहर आयोजना कार्यालयबाट सात करोड १६ लाख ४१ हजार ३०६ रुपियाँ १७ पैसा खर्च भएको छ । विभिन्न पाँच प्याकेजमा खर्च भएको यो रकमले बसपार्क क्षेत्रको सडक कालोपत्रे, बसपार्कको सुरक्षित घेराबार, बाथरुम तथा शौचालय निर्माण, टिकट घर तथा भाडामा दिन मिल्ने पाँच वटा सटर सहितका कोठा निर्माण भएका छन् । 

तर हालसम्म पनि बसपार्क सञ्चालनमा आउन सकेको छैन । जसको कारण एकातिर करोडौको संरचना प्रयोगविहिन भएर लथालिङग बन्दै गईरहेको छ भने अर्कोतर्फ राज्यलाई प्राप्त हुने राजश्व गुमिरहेको छ । 

चौरजहारीमा मुख्य कार्यालय रहेको मातृभूमि यातायात प्रा.लि.का अध्यक्ष तिलक बस्नेतले नगरपालिकाले बसपार्क सञ्चालनमा लापरबाहि गरिरहेको बताउनुभयो । उहाँले आफ्नो समितिलाई बसपार्क सञ्चालनको जिम्मा दिएमा बार्षिक दश लाख रुपियाँ राजश्व तिर्न तयार रहेको कुरा नगरपालिका समक्ष दर्शाउँदा पनि नगरपालिका कानमा तेल हालेर बसेको उल्लेख गर्नुभयो । 

यातायात व्यवसायीहरुले बसपार्क सञ्चालनमा नरहेकोले साना तथा ठुला गाडीहरु पार्किङमा समस्या हुने गरेको बताएका छन् । मुख्य बजार क्षेत्रमै गाडी थन्काउनु पर्ने बाध्यता रहेको व्यवसायीहरुको गुनासो रहेको छ ।  

यस बिषयमा चौरजहारी नगरपालिका प्रमुख पुष्प वादीले निर्माण भएको बसपार्क सञ्चालनको लागि आवश्यक कानून निर्माण गरेर ठेक्का प्रक्रियामा लैजाने तयारी भईरहेको बताउनुभयो । कार्यविधि बिना सञ्चालन गर्दा कानूनी व्यवधान हुने भएकोले त्यसैको तयारीको क्रममा केहि ढिलाई हुन गएको तर छिट्टै नै सञ्चालन गरिने उहाँको भनाई छ ।