रुकुम पूर्वमा अटो र मोटरसाईकल ठोक्किँदा सात जना घाईते

रुकुम पूर्वको भूमे गाउँपालिका ४ स्थित काँडाबगरमा अटो र मोटरसाईकल एक आपसमा ठोक्किदा सात जना घाइते भएका छन् ।

शनिवार साँझ अन्दाजी साढे पाँच बजेतिर मध्यपही लोकमार्ग अन्तर्गत खावाङबगरबाट रुकुमकोटतिर आउदै गरेको लुम्बिनी प्रदेश ०२-००१ ह १४९३ नम्वरको अटो र विपरीत दिशातर्फ गैरहेको कर्णाली प्रदेश ०३००१ प ०७६८ नम्वरको मोटरसाइकल एक आपसमा ठोक्किदा दुर्घटना भएको प्रहरीले बताएको छ ।

जिल्ला प्रहरी कार्यालय रुकुम पूर्वका अनुसार घाइते हुनेहरुमा अटोमा सवार रुकुम पूर्व भुमे गाँउपालिका वडा नम्वर २ खाबाङका अटो चालक ४५ बर्षिय सहिन पुन, सोही ठाउँका ११ बर्षिय सुदिप पुन, २७ बर्षिया अस्मिता झाक्रि बुढामगर, ४३ बर्षिया कर्म कुमारी पुन र ८ वर्षीय बचन पुन रहेका छन् ।

यसैगरी रुकुम पश्चिमको आठविसकोट नगरपालिका वडा नम्वर १० का १८ बर्षिय मोटरसाईकल चालक गणेश शाही र सल्यान जिल्ला बाघचौर नगरपालिका ६ का १९ बर्षिय मोटरसाईकलमा सवार बसन्त भण्डारी पनि घाईते रहेका छन् ।

घाइतेहरुमध्ये छ जनाको जिल्ला अस्पताल रुकुमकोटमा उपचार भैरहेको छ । उनीहरुको अवस्था सामान्य रहेको छ । त्यसैगरी घाइते कर्म कुमारी पुनको थप उपचारका लागि सुविधासम्पन्न अस्पतालमा रिफर गरिएको जिल्ला अस्पताल रुकुम पूर्वले जनाएको छ ।