हुलाक कार्यालयमा पहिलो आउने सेवाग्राही र अवकाश प्राप्त कर्मचारी सम्मानित

जिल्ला हुलाक कार्यालय रुकुम पश्चिमले विविध कार्यक्रमका साथ १५१ औं विश्व हुलाक दिवस मनाएको छ । 

कार्यालयले तीन दिनसम्म दीप प्रज्वलनका साथै सेवाग्राही र अवकाश प्राप्त कर्मचारी सम्मान, अन्तरक्रिया, सरसरफाई लगायतका कार्यक्रमहरु गरेर दिवस मनाएको हो । 

जिल्ला हुलाक कार्यालयका हुलाक अधिकृत कुमारी रिमा मल्लका अनुसार दिवसको अवसरमा बिहिबार कार्यालयमा पहिलो आउने सेवाग्राहीलाई सम्मानसहित कार्यालयको सेवा प्रारम्भ गरिएको हो । त्रिवेणी गाउँपालिका ९ का ईमान डाँगीलाई सम्मानसहित डायरी, डटपेन उपहार दिनुका साथै खादा र अबिर लगाएर फूलले स्वागत गरिएको हो । 

त्यसैगरी गत आर्थिक वर्ष ०८१/०८२ मा अवकाश प्राप्त तीन जना कर्मचारीहरुलाई सम्मान गरिएको छ । हुलाकी केशव कुमार रोका, हुलाक प्रतिनिधि कमला के.सी. र डाँक वाहक शीतली ओलीलाई सम्मान गरिएको हो । 

उहाँहरुले हुलाक सेवा दिनु भएको योगदानको कदर गर्दै दिवसको सन्दर्भ पारेर सम्मान पत्र, खादा, अबिर र फूलले सम्मान गरिएको हुलाक अधिकृत मल्लले जनाउनुभयो । 

दिवसकै अवसरमा तीन दिनसम्म दीप प्रज्वलन गरिनुका साथै कार्यालय परिसर सरसरफाई पनि गरिएको छ । हुलाक सेवाको लोगो र १५१ औ विश्व हुलाक दिवसको नारा "Post for People : Local Service Global Reach" अंकित टिसर्टमा सबै कर्मचारीहरु सहभागी भएर कार्यालय परिसर सरसफाई गरिएको हो । 

यहि सन्दर्भमा पालिका हुलाक र जिल्ला हुलाक कार्यालय बिच प्रभावकारी हुलाक सेवाको बारेमा अन्तरक्रिया समेत गरिएको छ ।