खलङगा जान्छु भनेर हिँडेका त्रिवेणीका घर्ती मृत अवस्थामा फेला 

रुकुम पश्चिमको त्रिवेणी गाउँपालिका -७ स्थित मुरु - झुल्नेटा सडकखण्डको शान्तीपाखामा एक पुरुषको शव फेला परेको छ । 

उक्त शव त्रिवेणी गाउँपालिका -६ बारीका निवासी ६६ वर्षीय भिमबहादुर घर्तीको रहेको प्रहरीले जनाएको छ । 

जिल्ला प्रहरी कार्यालय रुकुम पश्चिमका सूचना अधिकारी प्रहरी निरीक्षक हरि प्रसाद पुनका अनुसार मुरु-झुल्नेटा सडकखण्डमा शान्तीपाखास्थित भिरबाटबाट खसेर घर्तीको मृत्यु भएको हो ।

सडकभन्दा करिब ३५ मिटर तल भीरबाट लडेको अवस्थामा शव रहेको भनेर स्थानीयले शुक्रबार बिहान प्रहरीलाई जानकारी गराएपछि घटनास्थलमा प्रहरी पुगेको छ । प्रहरीका अनसुार घर्ती जिल्ला सदरमुकाम जान्छु भनेर गत बुधबार बिहान घरबाट हिड्नुभएको थियो । 

घरबाट निस्केको तीन दिनमा घर्तीको शव भेटिएको हो । घटनास्थल घर्तीको घरदेखि करिब तीन किलोमिटर टाढा रहेको छ ।

प्रहरीले घटनाको थप अनुसन्धान भईरहेको जनाएको छ । शव पोष्टमार्टमको लागि जिल्ला अस्पताल ल्याउने तयारी भईरहेको बताईएको छ ।