चौरजहारी नगरपालिका ८ को सेवा प्रवाह आफ्नै भवनबाट 

रुकुम पश्चिमको चौरजहारी नगरपालिका वडा नम्वर ८ को कार्यालयले आफ्नै भवनबाट सेवा प्रवाह सुरु गरेको छ । 

बुधबार वडा कार्यालयको नवनिर्मित प्रशासकीय भवनको उद्घाटनपछि वडाले आफ्नै भवनबाट सेवा प्रवाह सुरु गरेको वडा अध्यक्ष शशिराम नेपालीले जानकारी दिनुभयो । 

नवनिर्मित भवनको नगर प्रमुख पुष्प वादीले उद्घाटन गर्नुभएको हो । सो अवसरमा उहाँले वडावासीको हित र सहजताको लागि नगरपालिकाको लगानीमा प्रशासनिक भवन निर्माण गर्न सफल भएको बताउनुभयो । नगर प्रमुख वादीले अब थप सहज, प्रभावकारी र सरल ढंगले सेवा प्रवाह हुनेमा विश्वास व्यक्त गर्नुभयो । 

वडा अध्यक्ष बिकले चौरजहारी नगरपालिकाको आर्थिक वर्ष ०८१/०८२ को स्वीकृत बजेटबाट भवन निर्माण गरिएको जानकारी दिनुभयो । सभाहल सहितको दुई तले भवनमा पाँच वटा कोठा र चार वटा शौचालय तथा बाथरुम रहेका छन् । भवन निर्माणमा ६५ लाख रकम खर्च भएको वडा अध्यक्ष बिकले जानकारी दिनुभयो । 

उहाँका अनुसार यस अघि भाडामा रहेको कोठाबाट सेवा प्रवाह हुँदै आएको थियो । अब भने आफ्नै भवनबाट सेवा सुरु भएकोले थप सहज हुने उहाँले जनाउनुभयो । भवन उद्घाटन कार्यक्रमको अवसरमा जग्गादाताहरु चन्द्र कामी र जसे पुन लगायत विभिन्न तवरले सहयोग गर्ने व्यक्तिहरुलाई नगर प्रमुख वादीले सम्मान गर्नुभएको छ । 

वडा अध्यक्ष बिकका अनुसार वडाको विद्यालयलाई जग्गादान गर्नुहुने अर्जुन मल्ल र टेकबहादुर मल्ल, स्वास्थ्य कार्यालयलाई जग्गादान गर्नुहुने बलबिर पुन, वडामा शिक्षा क्षेत्रमा महत्वपूर्ण योगदान दिनुहुने शिक्षक लालबहादुर घर्तीलाई सम्मान पत्र, दोसल्ला सहित सम्मान गरिएको हो । 

त्यसैगरी वडामा खानेपानीको लागि ठुलो सहयोग गर्नुहुने हरे कामी र भद्रे पुनलाई पनि सम्मान गरिएको छ । उहाँहरुले व्यक्तिगत खर्चमा विद्यालय, स्वास्थ्य चौकी र वडा कार्यालयमा खानेपानी व्यवस्थापनमा सहयोग गर्नुभएको वडा अध्यक्ष नेपालीले जानकारी दिनुभयो । 

उक्त कार्यक्रममा निमित्त प्रमुख प्रशासकीय अधिकृत शेर प्रसाद ढकाल, जनप्रतिनिधिहरु, वाईसियल नेपालका जिल्ला अध्यक्ष एलबी कटुवाल, स्थानीय बुद्धिजीवीहरु लगायत स्थानीयको सहभागिता रहेको थियो ।