रुकुमेली साहित्यकार ओलीलाई 'पशुपती शाह स्मृति साहित्य पुरस्कार' प्रदान

रुकुम पश्चिमको मुसिकोट नगरपालिका -४ सोलावाङ निवासी साहित्यकार पूर्ण ओलीलाई पशुपती शाह स्मृति साहित्य पुरस्कार, २०८२ प्रदान गर्नुका साथै सम्मान गरिएको छ । 

बाँकेको नेपालगञ्जमा सिर्जना कला साहित्य प्रतिष्ठानले आयोजना गरेको बिशेष कार्यक्रमका बिच ओलीलाई सम्मान तथा पुरस्कार प्रदान गरिएको हो । 

२०४१ सालमा जमर्को पत्रिकामा 'गोमन सर्प' कविता प्रकाशित गरी साहित्य क्षेत्रमा प्रवेश गर्नु भएका ओलीले मानवीय कुण्ठा, मनोविज्ञान र प्रकृतिको सूक्ष्म विश्लेषण गर्दै आफ्‌ना सिर्जनाहरु मार्फत नेपाली साहित्यको उन्नयनमा महत्त्वपूर्ण योगदान दिएकोले उहाँलाई पुरस्कृत गरिएको हो ।

प्रतिष्ठानका महासचिव जीतबहादुर शाहद्वारा पशुपती शाह स्मृति साहित्य पुरस्कार स्थापना गरिएको हो । प्रतिष्ठानका अध्यक्ष शशिराम कार्कीको अध्यक्षतामा भएको उक्त कार्यक्रममा लुम्बिनी प्राविधिक विश्वविद्यालय, सेवा आयोगका सदस्य एवम् साहित्यकार प्रा. डा. कृष्णप्रसाद घिमिरेको प्रमुख आतिथ्यता रहेको थियो ।  कार्यक्रममा विभिन्न साहित्यकार तथा सर्जकहरुको उपस्थिति रहेको थियो । 

सोही अवसरमा सिर्जना कला तथा साहित्य प्रतिष्ठानद्वारा वि.विकास साहित्य रत्न सम्मानबाट साहित्यकार भरतबहादुर रानाभाट र भूपेन्द्रप्रकाश प्रतिभा गौरव सम्मानबाट साहित्यकार विष्णुलाल कुमाल पनि सम्मानित हुनुभएको थियो ।