रुकुम कारागारबाट भागेका दुई जना आफै आए, ५५ जना पक्राउ परे

गत बिहिबार रुकुम पश्चिम कारागारबाट भागेका कैदीबन्दी मध्य ३१ जना अझै पनि फरार रहेका छन् । भागेका ८८ जना मध्य ५७ जनालाई पुनः कारागार फर्काइएको छ ।

जिल्ला प्रहरी कार्यालयका सूचना अधिकारी हरिप्रसाद पुनका अनुसार आईतबार दिउँसोसम्म ५७ जना कैदीबन्दी कारागार फर्काएको हो । ५५ जनालाई पक्राउ गरेर ल्याईएको हो भने दुई जना आफै सम्पर्कमा आएका हुन् । 

प्रहरीले कारागारबाट भागेकाहरूको खोजी तीव्र पारेको जनाएको छ । फरारको खोजी क्रम चलिरहेको र पछिल्लो पटक २ जना कैदीबन्दी पक्राउ परेसँगै पक्राउ पर्नेको सङख्या ५७ पुगेको प्रहरी निरीक्षक पुनले बताउनुभयो । जेन–जी आन्दोलनको मौका पारेर मुसीकोट नगरपालिका १ स्थित रुकुम कारागारबाट ८८ जना कैदीबन्दी तोडफोड गरेर भागेका थिए ।  

अझै ३१ जना कैदीबन्दी फरार रहेको प्रहरी निरीक्षक पुनले बताउनुभयो । फरार हुनेहरूमा गम्भीर प्रकृतिको अपराधमा दोषी ठहर भई सजाय भुक्तान गरिरहेकाहरू समेत रहेको प्रहरीले जनाएको छ । २५ जनाको क्षमता रहेको यस कारागारमा १५८ जना कैदीबन्दीहरु रहेका थिए ।