रूकुम पश्चिमको चौरजहारीमा शोक विदा

रुकुम पश्चिमको चौरजहरी नगरपालिकाले शोक बिदा गरेको छ। 

काठमाडौं लगायत देशका ठूला सहरमा २०८२ भाद्र २३ गते जेन जीद्वारा न्याय, समानता, अधिकार र सुशासनका लागि आयोजित आन्दोलनका क्रममा हालसम्म १९ जनाले ज्यान गुमाउनु परेको र दर्जनौं सङ्ख्यामा घाइते भएको पीडादायी घटनाले चौरजहारी नगरपालिका स्तब्ध र मर्माहत भएको भन्दै नगरपालिकाले शोक बिदा दिएको हो। 

नगर प्रमुख पुष्प वादीले जारी गरेको शोक विज्ञप्तीमा भनिएको छ - "आन्दोलनमा संलग्न जेन-जी पुस्ताका युवाहरूको निधनप्रति सम्पूर्ण राष्ट्रकै लागि अपूरणीय क्षति भएको र यस दुःखद घडीमा चौरजहारी नगरपालिका नगर कार्यपालिकाको कार्यालय दिवंगतप्रति भावपूर्ण श्रद्धाञ्जली अर्पण गर्दै शोकाकुल परिवारजनप्रति गहिरो समवेदना व्यक्त गर्दछु।"

 उहाँले देश शोकमा डुबेको पीडादायी क्षणमा चौरजहारी नगरपालिका नगर कार्यपालिकाको कार्यालय र सो अन्तर्गतका निकाय तथा सामुदायिक र संस्थागत विद्यालयहरूमा समेत मिति २०८२ भाद्र २४ गते शोक बिदा दिइएको जानकारी दिनुभयो ।