चौरजहारीमा १० जना चढेको अटो दुर्घटना हुँदा ५ जना घाईते

रुकुम पश्चिमको चौरजहारी नगरपालिका ७ कोटजहारीमा अटो दुर्घटना हुँदा पाँच जना घाईते भएका छन् । 

आईतबार दिउँसो कोटजहारीस्थित भित्रि सडकखण्डमा कोटजहारीबाट चौरजहारी बजारतर्फ जाने क्रममा भे २ ह १३६९ नम्वरको अटो दुर्घटना भएको प्रहरीले जनाएको छ । 

जिल्ला प्रहरी कार्यालयका सूचना अधिकारी प्रहरी निरीक्षक हरि प्रसाद पुनका अनुसार दुर्घटनामा परेर चौरजहारी नगरपालिका ६ निवासी पाँच जना घाईते भएका छन् । घाईते हुनेहरुमा ५९ वर्षिय सुर्य बोहरा, १० वर्षीय प्रशान्त बिक, १३ वर्षीय धनेश पुन मगर, ७ वर्षीय प्रजय बुढाथोकी र १३ वर्षीया अस्मिता परियार रहेका छन् । 

घाईतेहरुलाई उपचारको लागि चौरजहारी अस्पतालमा भर्ना गरिएकोमा घाईते मध्य प्रजय र अस्मितालाई उपचारपछि डिस्चार्ज गरिएको छ भने अन्य तीन जनाको उपचार भईरहेको छ । घाईते बोहराको खुट्टा भाँचिएको छ भने अन्य दुई जनाको अवस्था सामान्य रहेको बताईएको छ । 

स्थानीयका अनुसार अटोमा चालकसहित १० जना रहेको बुझिएको छ । अटो चालक चौरजहारी नगरपालिका ६ निवासी २८ वर्षीय सुजन पुन मगरसहित पाँच जना भने सकुशल रहेको बताईएको छ । 

क्षमता भन्दा बढी यात्रुहरु रहेको अटो ब्रेक फेल हुँदा अनियन्त्रित भई सडकमै पल्टिएको बताईएको छ । अटो चालकलाई इलाका प्रहरी कार्यालय चौरजहारीले प्रहरीले नियन्त्रणमा लिएको र थप अनुसन्धान भईरहेको जनाएको छ ।