मुसिकोट हेरिटेज रनमा रुकुम पश्चिमका दुर्गा प्रथम

रुकुम पश्चिमको मुसिकोटका पर्यटकीय स्थानहरुको प्रचार एवम् प्रवद्र्धन गर्ने मुख्य उद्धेश्यका साथ बिहिबार सञ्चालन गरिएको मुसिकोट हेरिटेज रन (मिनी म्याराथन),२०८२ मा रुकुम पश्चिमको मुसिकोटनगरपालिका ५ निवासी दुर्गाराज बुढाले प्रथम स्थान हाँसिल गर्नुभएको छ ।

आयोजक राप्ती साहित्य परिषदका केन्द्रीय सदस्य तथा म्याराथन संयोजक पुर्ण ओलीका अनुसार  बुढाले निर्धारित २८ किलोमिटर दुरी १ घण्टा ५२ मिनेट ४७ सेकेन्डमा पार गरेर प्रथम स्थान हाँसिल गर्नुभएको हो।

प्रतियोगितामा रुकुम पूर्वको सिस्ने गाउँपालिका ४ का पञ्चराम बुढामगर दोस्रो र रुकुम पूर्व भूमे ३ का शक्तिराम रोकाले तेस्रो स्थान प्राप्त गर्नुभएको छ । पञ्चरामले निर्धारित दुरी १ घण्टा ५७ मिनेट ४६ सेकेन्ड र शक्तिरामले २ घण्टा १ मिनेट ३९ सेकेन्डमा पूरा गरेको ओलीले जनाउनुभयो । 

प्रतियोगितामा मुसिकोट नगरपालिका १ का भुवन केसी चौथो र षडानन्द ४ भोजपुरका विशाल तामाङ पाँचौँ हुनुभयो । उहाँहरूले निर्धारित दुरी क्रमशः २ घण्टा ६ मिनेट ३६ सेकेन्ड र २ घण्टा १० मिनेट ३५ सेकेन्डमा पुरा गर्नुभएको छ ।

त्यसैगरी रुकुम पश्चिमको सानीभेरी ३ का भुवन ओली छैटौँ, जाजरकोट बारेकोट गाउँपालिका २ का महेन्द्र शाही सातौँ, रुकुम पश्चिम आठबिसकोट नगरपालिका ९ का धनबहादुर केसी आठौँ, रुकुम पूर्व सिस्ने गाउँपालिका ४ का लोकेन्द्र बुढामगर नवौँ र रुकुम पश्चिम आठबिसकोट नगरपालिका ९ का किस्मत केसीले दशौँ स्थान हाँसिल गर्नुभएको छ। 

प्रथम स्थान हाँसिल गर्न सफल दुर्गाराजले नगद २५ हजार, दोस्रो हुने पञ्चरामले २० हजार र तेस्रो हुने शक्तिरामले १५ हजार पुरस्कार पाएको राप्ती साहित्य परिषद्का केन्द्रीय सदस्य तथा म्याराथन संयोजक ओलीले जानकारी दिनुभयो । उहाँका अनुसार चौथो र पाँचौँ स्थान प्राप्त गर्ने भुवन र विशालले ५,५ हजार पुरस्कार पाउनुभएको छ । 

अन्य सबै सहभागी धावकहरूलाई १,१ हजार रुपैयाँ प्रदान गरिएको ओलीले बताउनुभयो । म्याराथनमा २३ जना धावकले प्रतिस्पर्धा गरेका थिए । डिग्रे मन्दिरबाट सुरु भएको म्याराथन घिमाने, जन्ति ओलप्पेको लेक, डयरीचौर, सातदुले पोखरी, पोखरा, खारादह, स्यान दह, ठुली दह, बैरीदह, साँख दह, नुनथला गेट हुँदै पुनः डिग्रे मन्दिरमा पुगेर सकिएको थियो । 

राप्ती साहित्य परिषद् रुकुम पश्चिमका अध्यक्ष मनलाल ओलीको अध्यक्षतामा भएको उद्घाटन तथा पुरस्कार वितरण समारोहमा कर्णाली प्रदेश सभा सदस्य कल्याणी खड्काको प्रमुख आतिथ्यता रहेको थियो ।

त्यस्तै कार्यक्रममा कर्णाली प्रदेश सभा सदस्य महेन्द्र केसी, जिल्ला समन्वय समितिका उपप्रमुख देवबहादुर बिक, मुसिकोट नगरपालिकाका प्रमुख महेन्द्र केसी, उपप्रमुख विमलकुमार पुन, प्रमुख जिल्ला अधिकारी दिनेश थानी र कर्णाली प्रदेशका पूर्व सचिव भरतकुमार शर्माको विशेष आतिथ्यता रहेको थियो ।