नेपाली सेनाद्वारा पेल्मामा तातोपानी स्नान कुण्ड निर्माण

रुकुम पूर्वको पुथा उत्तरगंगा गाउँपालिका –२ पेल्मा नजिकै रहेको तातोपानी क्षेत्रमा 'तातोपानी स्नान कुण्ड' निर्माण गरिएको छ । 

नेपाली सेनाको चण्डीदल गणले तातोपानी स्नान कुण्डको निर्माण गरी स्थानीय समुदायलाई हस्तान्तरण समेत गरेको छ । बुधबार एक कार्यक्रमका बिच गणपति प्रमुख सेनानी विनिश श्रेष्ठले तातोपानी स्नान कुण्डको उद्घाटन गर्नुभएको छ । उहाँले चण्डीदल गणको आन्तरिक श्रोत तथा साधनको प्रयोग गरी सकलदर्जाहरुको अथक प्रयास परिश्रमबाट स्नान कुण्ड निर्माण भएको बताउनुभयो । 

उद्घाटन कार्यक्रमको अवसरमा गणपति श्रेष्ठले सच्चा मनका साथ एक अर्कालाई आत्मसाथ गरेर समुदायको माग र सहकार्यमा मुहानको संरक्षणको काम सम्पन्न भएको बताउनुभयो । उहाँले नेपाली सेना र नागरिकको सम्बन्ध हृदयबाट नै आत्मिय रहने उल्लेख गर्नुभयो । प्रमुख सेनानी श्रेष्ठले यो सम्बन्ध तातोपानी कुण्ड बनाउनुसँग मात्रै सिमित नहुने भएकोले थप प्रगाढ भएर जाने बताउनुभयो । 

पुथा हिमालबाट आएको तातोपानी खोलामा ढुंगा फुटालेर मुहान निकालेको र यसको संरक्षण तथा सहज उपयोगका लागि सुरक्षित कुण्ड निर्माण गरिएकोले स्थानीय र पर्यटकहरुलाई सहजता हुने विश्वास उहाँले व्यक्त गर्नुभयो । 

नवनिर्मित तातोपानी स्नान कुण्ड उद्घाटनको अवसरमा बोल्नुहुँदै स्थानीय नमूना आमा समुहका अध्यक्ष जगमाया पुनले कसैको पनि नजर पुग्न नसकेको तातोपानी क्षेत्रमा नेपाली सेनाको ध्यान पुगेर तातोपानीको संरक्षण गर्ने कार्य भएको बताउनुभयो । उहाँले सेनाले निश्वार्थ रुपले दुर्गम गाउँमा पुगेर जनताको हितका लागि काम गरेको समेत उल्लेख गर्नुभयो ।

काम बिशेषले पेल्मा र तातोपानी क्षेत्रमा पुगेको नेपाली सेनाको टोलीले तातोपानीको संरक्षणका लागि चासो देखाएर समुदायसँगको सहकार्यमा सुरक्षित स्नान कुण्ड नै बनाईदिएको उहाँले प्रष्ट पार्नुभयो । 

स्थानीय जितमान बिकले जिल्लाकै विकट वडामा रहेको पर्यटकिय सम्भावना बोकेको क्षेत्रमा पुगेर नेपाली सेनाले तातोपानीको मुहान संरक्षण गरेर स्थानीयलाई ठुलो सहयोग गरेको बताउनुभयो । पर्यटकिय सम्भावना बोकेको ठाउँमा पनि राज्यको नजर पुग्न नसकेको अवस्थामा सेनाले यहाँको पर्यटकिय स्थललाई व्यवस्थित गरिदिएको समेत उहाँले जनाउनुभयो । 

तातोपानी स्नान कुण्ड उद्घाटनको अवसरमा स्थानीय आमा समुह, झाँक्री समुह र स्थानीवासीले नेपाली सेनालाई फूलमालासहित स्वागत गरेका थिए । यसका साथै कार्यक्रमा मौलिक बाजागाजाका साथ स्थानीय नाच समेत प्रस्तुत गरिएको थियो । 

कुण्ड उद्घाटन कार्यक्रममा चण्डीदल गणका गणपति प्रमुख सेनानी विनिश श्रेष्ठ, सेनानी सुस्पन कटुवाल, पुथा उत्तरगंगा गाउँपालिका १ का वडा सदस्य औशी घर्ती लगायत स्थानीयवासीको सहभागीता रहेको थियो । 

तातोपानीमा नुहाउनाले बाथ, हाडजोर्नी तथा छालासम्बन्धी दाद, घाउ, खटिरा, चायाँ, मुसा, डन्डिफोरलगायत रोगहरू निको हुने विश्वास रहेको छ ।