स्यार्पु सिस्ने ट्रेकिङ रुटमा पर्यटकको आवासको लागि सामुदायिक भवन निर्माण 

रुकुम पश्चिमको बाँफिकोट गाउँपालिका –३ डम्मानामा पर्यटकहरुको लागि सामुदायिक भवन निर्माण गरिएको छ । स्यार्पु सिस्ने ट्रेकिङ रुटको बिच भागमा पर्यटकहरुको आवास सुविधाको लागि व्यक्तिगत पहलमा भवन तयार गरिएको हो । 

स्थानीय समेत रहनुभएका पर्यटनकर्मी गोपाल केसीले यो भवनले पर्यटकहरुलाई आवासको लागि प्रत्यक्ष फाईदा पुग्ने बताउनुभयो । उहाँका अनुसार भवनले स्यार्पु सिस्ने ट्रेकिङ रुटका लागि आउने तथा अन्य दृश्यावलोकनका लागि आउने पर्यटकहरुलाई सहज हुनेछ ।

यस स्थानमा स्थानीय तथा बाह्य पर्यटकको आगमनमा अझ बृद्धि हुने बताईएको छ । पछिल्लो समय यस क्षेत्रमा आउने पर्यटकहरुको संख्यामा बृद्धि भएको स्थानीयको भनाइ छ । आवास सुविधा समेत रहेकोले अब पर्यटकहरु थप बढ्ने आशा रहेको छ । 

कर्णालीकै प्रशिद्ध स्यार्पुतालको जलाधार क्षेत्रमा पर्ने यो स्थान निकै सुन्दर तथा मनमोहक रहेको छ । यसको माथिल्लो क्षेत्रमा सिस्ने हिमाल रहेको छ भने चारैतिर वन जङगल, सुन्दर डाँडाकाँडा रहेका छन् । तत्कालिन माओवादीले जनयुद्धताका भूमिगत रुपमा सञ्चालन गरेको रेडियो गणतन्त्र एमफम समेत यहि स्थानबाट प्रशारण हुने गर्दथ्यो । 

बाँफिकोट गाउँपालिका घर भई हाल अमेरिकामा रहनुभएका राकेश केसीको मुख्य पहलकदमी तथा अन्य सहयोगीहरुमार्फत संकलन गरिएको करिब दुई लाखको लगानीमा उक्त सामुदायिक भवन निर्माण सम्पन्न भएको भवन निर्माण समितिका संयोजक बुद्धि केसीले जानकारी दिनुभयो । उहाँका अनुसार भवनमा दुईवटा कोठा रहेका छन् । 

व्यक्तिगत पहलमा निर्माण गरिएको उक्त भवनको एक कार्यक्रमका बिच उद्घाटन समेत गरिएको छ । सामुदायिक भवन निर्माण समितिका संयोजक बृद्धि केसीको अध्यक्षतामा भएको उद्घाटन कार्यक्रममा वडा अध्यक्ष तिलबिर केसीको प्रुमख आतिथ्यता रहेको थियो ।

अर्जुन केसीको बिशेष आतिथ्यता रहेको उक्त कार्यक्रममा पर्यटनकर्मी गोपाल केसी, स्यार्पुताल माविका प्रधानाध्यापक चुमान सिं बोहरा, स्थानीय अगुवाहरु पूर्ण बहादुर केसी, धनबहादुर मल्ल र धनबहादर बुढाको आतिथ्यता रहेको थियो । पर्यटनकर्मी यज्ञ चन्दले सञ्चालन गर्नुभएको उक्त कार्यक्रममा भवन निर्माण समितिका सचिव प्रकाश केसीले स्वागत मन्तव्य राख्नु भएको थियो । 

उद्घाटनको अवसरमा स्थानीय महिला समुहद्वारा स्वागत गित तथा नृत्य प्रस्तुत गरिएको थियो । यो क्षेत्र समुन्द्र सतहदेखि करिब तीन हजार मिटरको उचाईमा रहेको छ । यहाँ चारैतिर हरियारी र वन जङगल रहेको छ भने विभिन्न थरीका जडिबुटी तथा चराचुरुङगीहरु पाईने गर्दछन् ।