स्वर्गीय आमाको स्मृति दिवसमा शीतल क्याम्पसमा छात्रवृत्ति रकम प्रदान

रुकुम पश्चिमको चौरजहारीमा रहेको शीतल क्याम्पसमा अध्ययनरत बिपन्न तथा जेहेन्दार विद्यार्थीहरुलाई छात्रवृत्तिको लागि एक लाख रुपियाँ प्रदान गरिएको छ । 

चौरजहारी नगरपालिका वडा नम्वर -५ निवासी स्व. कस्तुरा ढकालको १४ औं स्मृति दिवसको अवसरमा उहाँका छोराहरुले विद्यार्थीहरुलाई छात्रवृत्तिको व्यवस्था गर्नुभएको हो । 

आज क्याम्पसमा आयोजित एक कार्यक्रमका बिच क्याम्पस व्यवस्थापन समितिका अध्यक्ष खुमबहादुर खड्का र क्याम्पस प्रमुख रमेश लामिछानेलाई स्व. ढकालका छोराहरु विशाल शर्मा र गोपाल शर्माले एक लाख रुपियाँको चेक हस्तान्तरण गर्नुभएको हो। विशाल चौरजहारी नगरपालिकाका पूर्व नगर प्रमुख एवम् समाजसेवी हुनुहुन्छ । गोपाल शर्मा कर्णाली प्रदेशको पूर्व आर्थिक मामिला तथा योजना मन्त्री हुनुहुन्छ । 

स्व. ढकालका चारभाई छोरा र पाँच बहिनी छोरी हुनुहुन्छ । छोराहरु कुल प्रसाद ढकाल, खिम प्रसाद ढकाल, बिशाल शर्मा र गोपाल शर्माले हरेक वर्ष स्वर्गिय आमाको स्मृति दिवसको अवसरमा सामाजिक कार्यका लागि उदाहरणिय काम गर्दै आउनु भएको छ । गत वर्ष पनि शीतल क्याम्पसमै एक लाख रुपियाँको छात्रबृत्ति प्रदान गरिएको थियो । 

उक्त रकम क्याम्पसमा अध्ययनरत गरिब तथा जेहेन्दार बिद्यार्थी छनौट गरेर प्रदान गरिने क्याम्पस प्रमुख रमेश लामिछानेले जानकारी दिनुभयो । उहाँका अनुसार क्याम्पसले चाँडै नै बिद्यार्थी छनौट गरेर छात्रबृत्ति प्रदान गर्नेछ । 

स्मृति दिवसको अवसरमा आयोजित उक्त कार्यक्रममा स्व. ढकालका छोराहरु बिशाल शर्मा र गोपाल शर्मा, चौरजहारी नगरपालिका प्रमुख पुष्प वादी, क्याम्पस व्यव्स्थापन समितिका अध्यक्ष खुमबहादुर खड्का, क्याम्पस प्रमुख रमेश लामिछाने, शिक्षकहरु, विभिन्न राजनितिक दलका प्रतिनिधिहरु लगायतको उपस्थिति रहेको थियो ।