दुलीस्थित टेलिकमको टावरमा समस्या, स्थानीयलाई नेटवर्क खोज्दै डाँडा उक्लिनुपर्ने बाध्यता 

रुकुम पश्चिमको सानीभेरी गाउँपालिका ५ र ६ को सिमाना दुलीको जुम्लेपाखरीमा रहेको नेपाल टेलिकमको टावरमा समस्या उत्पन्न भएपछि सर्वसाधारणहरु मारमा परेका छन् । 

नेटवर्कमा समस्या आएपछि फोन तथा इन्टरनेट सुविधाको लागि अग्लो डाँडामा पुग्नुपर्ने बाध्यता रहेको यहाँका स्थानीयले गुनासो गरेका छन् ।

स्थानीय अजय बस्नेतका अनुसार टावरमा गत बैशाख महिनादेखि नै समस्या देखिएको छ । असार महिना यता टावरमा थप समस्या आएपछि नेटवर्कले काम नगरेको उहाँको जानकारी दिनुभयो । 

यो समस्या बारेमा जिल्ला र प्रदेश कार्यालय समेतलाई जानकारी गराएको तर समस्या समाधानको लागि चासो नदिएको उहाँको गुनासो रहेको । बेला बेला नेटवर्कका आएको खराबीको कारण सानीभेरी गाउँपालिका ५ र ६ र बाँफिकोट गाउँपालिका ८ का सर्वसाधारणहरु मर्कामा परेको उहाँले उल्लेख गर्नुभयो । 

यस बिषयमा नेपाल टेलिकम रुकुम पश्चिमका कार्यालय प्रमुख कृष्ण शर्माले बर्षायाम सुरु भएपछि कहिलेकाँहि समस्या देखिएतापनि सेवा नै अवरुद्ध नभएको बताउनुभयो । उक्त स्थानमा विद्युत लाईन नपुगेको कारण सोलार सिस्टम जडान गरिएको छ । सोलार सिस्टम चार्ज नहुँदा पावर नपुग्ने र कहिलेकसो नेटवर्कमा समस्या आएको हुनसक्ने उहाँले उल्लेख गर्नुभयो । 

दुलीस्थित नेपाल टेलिकमको टावरसँग अर्माको टावरको रेडियो लिङक जडान भएको छ । कहिलेकाँहि सिस्टमका पावर नपुग्दा नेटवर्क डाउन हुने गरेको टेलिकमले जनाएको छ । विद्युतको लाईन बिस्तार भएमा उक्त समस्या समाधान हुने बताईएको छ ।