क्यान्सरपीडित शोभाको उपचारको लागि शीतल माविको विद्यार्थी समुहद्वारा आर्थिक सहायता

रुकुम पश्चिमको चौरजहारी नगरपालिका ११ खोलागाउँ निवासी ४० वर्षीया शोभा डाँगी खत्रीको उपचारको लागि आर्थिक सहायता गरिएको छ । 

क्यान्सर रोगबाट पीडित शोभाको उपचारमा सहयोग पु¥याउने उद्धेश्यका साथ चौरजहारी नगरपालिका २ मा रहेको शीतल माविबाट २०६७ सालमा एलएलसी दिएका विद्यार्थीहरुको समुहले आर्थिक रकम प्रदान गरेको हो । 

शीतल माविका पूर्व विद्यार्थी एवम् एसएलसी ब्याच २०६७ को समुहका सदस्य बिक्रम बिष्टका अनुसार उहाँलाई ३७ हजार ७७५ रुपियाँ उपलब्ध गराईएको हो । अस्पतालमै पुगेर उक्त रकम हस्तान्तरण गरिएको हो । 

यस विद्यार्थी समुहले केहि बर्ष यता विभिन्न सामाजिक कार्यमा सहयोग गर्दै आईरहेको छ । रक्तदान, सरसरफाई, विचल्लीमा परेका बालबालिकालाई आर्थिक सहायता लगायतका कार्यमार्फत शीतल माविबाट २०६७ सालमा एसएसलसी दिएका विद्यार्थीहरुले उदाहरणीय काम गरिरहेका छन् । 

शोभा अहिले बाँकेको खजुरास्थित सुशिल कोईराला प्रखर क्यान्सर अस्पतालमा उपचाररत हुनुहुन्छ । विगत १८ महिनादेखि उहाँ उपचाररत हुनुहुन्छ । उहाँको आन्द्रा, कलेजो र पाठेघरमा पाठेघरको संक्रमण देखिएको छ । 

पारिवारीक अवस्था सामान्य रहेको र क्यान्सर रोगबाट ग्रसित भएपछि उपचारको लागि उहाँलाई आर्थिक अभाव खड्किएको छ । उपचारकै क्रममा घरको आर्थिक अवस्था नाजुक बनेको छ । 

शोभाका भाई डिल्ली डाँगीका अनुसार दिदिलाई अस्पताल लिने ल्याउने क्रम जारी रहेको छ । नियमित उपचार गरेमा उहाँको स्वास्थ्यमा सुधार आउने तर खर्च महंगो हुने चिकित्सकले जनाएका छन् । 

शोभाको उपचारको लागि सक्दो सहयोग गर्न आग्रह गरिएको छ । मनकारी र सहयोगी व्यक्तिहरुले उहाँको नाममा रहेको तपशिलको बैंक खातामा रकम सहयोग गर्न सकिनेछ ।