पहिराेले पानी ट्याङकी र पाईपलाईन पुरिएपछि खोलागाउँका पाँच टोलमा खानेपानीको समस्या

रुकुम पश्चिमको चौरजहारी नगरपालिका ११ का पाँच वटा टोलमा चार दिनदेखि खानेपानीको समस्या सिर्जना भएको छ । यहाँका करिब १५० घरधुरीले प्रयोग गर्दै आएको खानेपानीको ट्याङकी र पाईपलाईन पहिरोले क्षति गरेपछि यहाँ खानेपानीको समस्या भएको हो । 

वडा नम्वर ११ का वडा अध्यक्ष तुल्से ओलीका अनुसार गत आईतबार (साउन ११ गते) को अविरल बर्षाको कारण आएको पहिरोले वडा नम्वर १४ छिर्नेपानीस्थित मुहानमा रहेको पानीको मुख्य ट्याङकी र पाईपलाईन ध्वस्त बनाएको छ । मुहानको ट्याङकी नै भत्किएपछि र पाईपलाईनमा क्षति गरेपछि गाउँमा आउने खानेपानी बन्द रहेको उहाँले जनाउनुभयो । 

२०४६ सालमा निर्मित छिर्नेपानी-भालुखोरे-नेप्टेकाँडा खानेपानी आयोजना अन्तर्गतको उक्त योजनामा क्षति भएपछि यहाँका सर्वसाधारणहरु खोलाको पानी पीउन बाध्य भएको वडा अध्यक्ष ओलीले जानकारी दिनुभयो । उक्त मुहानको पानी वडा नम्वर ११ का घारीटाकुरा, भालुखोरे, नेप्टेकाँडा, तलिगाउँ र माझगाउँका टोलवासीले उपयोग गर्ने गरेका थिए । 

वडा नम्वर ११ निवासी खिमबहादुर ओलीले चार दिनदेखि मुख्य मुहानबाट गाउँमा खानेपानी नआएको बताउनुभयो । उहाँका अनुसार यसको मारमा सर्वसाधारणहरु परेका छन् । अहिले टोलमा रहेको रिजर्भ पानी ट्याङकी र आकाशे पानी थापेर केहिले घरधुरीले खानेपानीको जोहो गरेका छन् भने केहिले करिब एक किलोमिटर टाढाको ठुलोखोलाबाट पानी बोकेर ल्याउन बाध्य भएका छन् ।

डलसिङ्गेमा रहेको लिफ्ट खानेपानी योजनाबाट पनि त्यस क्षेत्रका केहि घरधुरीले पानी उपयोग गरेको उहाँले जनाउनुभयो । भालुखोरे लगायतका टोलका सर्वसाधारणहरुलाई भने खानेपानीको जोहो गर्न समस्या भईरहेको उहाँको भनाई छ । 

खानेपानीको मुहानमा भएको क्षतिको आँकलन गरेर तत्काल मर्मत गर्नुपर्ने यहाँका उपभोक्ताहरुको मागर रहेको छ । रिजर्भ ट्याङकीको पानी सकिएको र अब आकाशेपानी नपरेपछि दैनिक घरायसी रुपमा उपयोग हुने पानी ल्याउन समेत गाग्री बोकेर टाढा जानुपर्ने चिन्ता उनीहरुको रहेको छ ।

बर्षायाममा खोलाको धमिलो पानी पीउन बाध्य हुँदा सम्भावित रोगहरुको समेत खतरा रहेको उनीहरुले उल्लेख गरेका छन् ।