चौरजहारी घटना : महिला संघद्वारा बिचल्लीमा परेका बालबालिकालाई ५३ हजार सहयोग

रुकुम पश्चिमको चौरजहारी नगरपालिका -३ टाटागाउँमा श्रीमानले आफ्नै श्रीमतीको हत्या गरेपछि बिचल्ली अवस्थामा रहेको तीन बालबच्चाहरुलाई विभिन्न निकायले सहयोग गर्ने क्रम जारी रहेको छ ।

यस क्रममा नेपाल महिला संघ चौरजहारी नगर समितिले बालबालिकाको सहयोगका लागि ५३ हजार २५५ रुपियाँ सहयोग गरेको छ ।  

उक्त रकम नेपाल महिला सङ्घ चौरजहारी नगर कार्यसमितिका अध्यक्ष सुगन्धा चन्दको नेतृत्वमा गएको टोलीले पीडित बालबालिकालाई हस्तान्तरण गरेको हो।

महिला संघमा आबद्ध सदस्यहरूबाट रकम संकलन गरेर उक्त सहयोग प्रदान गरिएको हो। 

महिला संघको टोली पीडितको घरमै पुगेर मृतकप्रति श्रद्धाञ्जली व्यक्त गर्दै शोकाकुल परिवारजनमा समवेदना समेत प्रकट गरिएको महिला सङ्घ चौरजहारी नगर समितिका सदस्य गोमा लामिछानेले जानकारी दिनुभयो। उहाँका अनुसार यस घटनाका दोषीलाई हदैसम्मको कारबाहिको माग समेग गरिएको छ ।

गत जेठ १७ गते राती ३२ वर्षीय चन्द्रबहादुर बुढाथोकीले ३० वर्षीया श्रीमती देविका बुढाथोकीलाई खुकुरी प्रहार गरेर हत्या गरेका थिए । आमाको हत्या र बुवा प्रहरी नियन्त्रणमा रहेपछि उनका तीन बालबालिका सहाराबिहिन बनेका छन् । मृतकका १३ र ११ वर्षीया दुई छोरी र ६ वर्षका एक छोरा रहेका छन् ।