आठबिसकोटबाट गर्भवती महिलाको हवाई उद्धार

रुकुम पश्चिमको आठबिसकोटबाट एक गर्भवती महिलाको हवाई उद्धार गरिएको छ । 

आठबिसकोट नगरपालिका वडा नम्वर ९ की ३६ वर्षीया मैसरी बटालाको हेलिकोप्टर मार्फत उद्धार गरिएको हो । 

आठबिसकोट नगरपालिका प्रमुख रबि केसीका अनुसार पाठेघरको बाहिर गर्भ रहेको र जिल्लामा शल्यक्रिया सम्भव नभएपछि थप उपचारको लागि हेलिकोप्टर मार्फत उद्धार गरेर सुर्खेत पठाईएको हो । पाठेघरमा बस्नुपर्ने बच्चा नलिमा बसेको र उक्त नलिफुटेपछि अत्याधिक रक्तश्राव भएको थियो । 
बटालालाई आज बिहान आठबिसकोट नगर अस्पतालमा उपचारको लागि ल्याईएको थियो । 

थप उपचारका लागि सुविधा सम्पन्न अस्पतालमा लैजान रिफर भएको र बटालाको आर्थिक अवस्था कमजोर भएकोले जिल्ला प्रशासन कार्यालय मार्फत हेलिकोप्टरको व्यवस्थापनमा सिफारिस गरिएको थियो ।

राष्ट्रपति महिला उत्थान कार्यक्रमबाट हवाई सेवा उपलब्ध गराईएको हो । बटालालाई नेपाली सेनाको हेलिकोप्टर मार्फत प्रदेश अस्पताल सुर्खेत लिईएको हो ।