चौरजहारी घटनामा पीडित बालबालिकालाई अनेम संघ रुकुमद्वारा आर्थिक सहयोग प्रदान

रुकुम पश्चिमको चौरजहारी नगरपालिका -३ टाटागाउँमा गत मंगलबार राती श्रीमानले आफ्नै श्रीमतीको हत्या गरेपछि बिचल्ली अवस्थामा रहेको तीन बालबच्चाहरुको लागि विभिन्न निकायले सहयोग गरेका छन् । 

यस क्रममा अखिल नेपाल महिला संघ रुकुम पश्चिमले बालबालिकाको सहयोगका लागि २५ हजार रुपियाँ सहयोग गरेको छ ।  

अनेम संघका केन्द्रिय सदस्य तथा रुकुम पश्चिम ईन्चार्ज कौशिला के.सी.को नेतृत्वमा आईतबार पीडितको घरमै पुगेर नगद रकम हस्तान्तरण गरिएको हो ।

घरमै अनेम संघको टोली पुगेर मृतकप्रति श्रद्धाञ्जली व्यक्त गर्दै शोकाकुल परिवारजनमा समवेदना समेत प्रकट गरिएको केसीले बताउनुभयो । यसका साथै घटनाका दोषीलाई हदैसम्मको कारबाहिको माग समेग गरिएको उहाँले उल्लेख गर्नुभयो । 

गत मंगलबार राती ३२ वर्षीय चन्द्रबहादुर बुढाथोकीले ३० वर्षीया श्रीमती देविका बुढाथोकीलाई खुकुरी प्रहार गरेर हत्या गरेका थिए । आमाको हत्या र बुवा प्रहरी नियन्त्रणमा रहेपछि उनका तीन बालबालिका सहाराबिहिन बनेका छन् । मृतकका १३ र ११ वर्षीया दुई छोरी र ६ वर्षका एक छोरा रहेका छन् ।