चौरजहारी घटना : नगरपालिकाद्वारा किरिया खर्च, खाद्यन्न र टेन्ट प्रदान

रुकुम पश्चिमको चौरजहारी नगरपालिका -३ टाटागाउँमा गत मंगलबार राती श्रीमानले आफ्नै श्रीमतीको हत्या गरेपछि टुहुरा अवस्थामा रहेको तीन बालबच्चाहरुको लागि विभिन्न निकायले सहयोग गर्न थालेका छन् । 

शनिबार चौरजहारी नगरपालिकाले किरिया, खाद्यन्न र टेन्ट उपलब्ध गराएको छ । नगर प्रमुख पुष्प बादी, उप प्रमुख ईश्वरी शर्मा बिएम, निमित्त प्रमुख प्रशासकीय अधिकृत शेर प्रसाद ढकाल लगायतको टोलीले पीडितको घरमै पुगेर उक्त सहयोग हस्तान्तरण गरेको हो । 

किरिया खर्च स्वरुप नगद २० हजार, चामल, दाल लगायतका दैनिक उपभोग्य खाद्यन्न सामाग्री र टेन्ट सेट प्रदान गरिएको निमित्त प्रमुख प्रशासकीय अधिकृत ढकालले जानकारी दिनुभयो । 

गत मंगलबार राती ३२ वर्षीय चन्द्रबहादुर बुढाथोकीले ३० वर्षीया श्रीमती देविका बुढाथोकीलाई खुकुरी प्रहार गरेर हत्या गरेका थिए । आमाको हत्या र बुवा प्रहरी नियन्त्रणमा रहेपछि उनका तीन बालबालिका सहाराबिहिन बनेका छन् । मृतकका १३ र ११ वर्षीया दुई छोरी र ६ वर्षका एक छोरा रहेका छन् । 

सहयोग हस्तान्तरण कार्यक्रममा नगर प्रमुख पुष्प बादीले तीन जना बालबच्चाको पढाई र रेखदेखको लागि नगरपालिकाले पहल गर्ने बताउनुभयो । उहाँले पीडामा परेका बालबच्चाको संरक्षक नगरपालिका रहेकोले भविष्यको चिन्ता नगरेर शोकलाई शक्तिमा बदल्न आवश्यक रहेको बताउनुभयो ।

नगर प्रमुख बादीले मृतकको शव पोष्टमार्टमको लागि जिल्ला अस्पताल लैजाँदा प्राईभेट एम्बुलेन्स प्रयोग भएको कुरा जानकारी गराउनुहुँदै उक्त एम्बुलेन्सको शुल्क समेत नगरपालिकाबाटै बेहोरिने जानकारी दिनुभयो ।

यसअवसरमा उहाँले नगरपालिका क्षेत्रमा भएका घटना/दुर्घटनापछि पोष्टमार्टमको लागि प्रयोग हुने शवबाहन सेवा नगरपालिकाले निशुल्क गरेको, गर्भवती तथा सुत्केरीहरुको लागि एम्बुलेन्स सेवा निशुल्क रहेको, नगर बसमा विभिन्न लक्षित वर्गका व्यक्तिहरुको लागि शुल्कमा छुटको व्यवस्था मिलाईएको जनाउनुभयो । 

यसका साथै नगरपालिकाको पहलमा पीडित बालबालिको नाममा बैंक खाता समेत सञ्चालन हुने भएको छ । पीडित बालबालिकाहरुलाई सहयोगको लागि विभिन्न व्यक्ति तथा निकायले चासो दिईरहेकोले सहजताको लागि हजुरबुवा संरक्षक रहने गरेर बैंक खाता सञ्चालन गर्न लगाईएको हो ।

उक्त खाता बैंकले आईतबार उपलब्ध गराउने जनाएको छ । नगरपालिकाको पहलमा नेपाल बैंकको कर्मचारीको टोली पीडितको घरमै गएर खाता सञ्चालनको व्यवस्था मिलाएको छ ।