विजयश्वरीमा छात्रबृत्तिको नयाँ योजना, पदक विजेता र उत्कृष्ट जिपिए ल्याउनेलाई छुटैछुट !

रुकुम पश्चिमको मुसिकोट नगरपालिका –१ मा रहेको संस्थागत विद्यालय विजयश्वरी बोर्डिङ स्कुलले अतिरिक्त क्रियाकलाप अन्तर्गत रनिङ शिल्ड प्रतियोगितामा विभिन्न पदक विजेता र एसइईमा ए प्लस ल्याउने विद्यार्थीलाई छात्रबृत्ति प्रदान गर्ने जनाएको छ । 

विजयश्वरीले रनिङ शिल्ड प्रतियोगितामा पदक विजेतालाई मासिक शुल्कमा २५ प्रतिशत देखि शतसम्म प्रतिशत र एसइईमा ए प्लस ल्याउनेलाई पालिका अनुसार एक जनाको दरले शत प्रतिशत छुट दिने व्यवस्था गरेको हो । 

स्कुलका प्रिन्सिपल जयबहादुर थापाका अनुसार यस वर्षदेखि एसइइमा ए प्लस प्राप्त गर्ने रुकुम पश्चिम र रुकुम पूर्वका नौ जना विद्यार्थीलाई जेहेन्दार छात्रवृत्ति प्रदान गरिने छ । रुकुम पश्चिमका ६ वटा पालिका र रुकुम पूर्वका तीनवटा गरी नौ वटा पालिकाका एक÷एकजना विद्यार्थीलाई जेहेन्दार छात्रवृत्ति प्रदान गर्ने निर्णय भएको उहाँले जनाउनुभयो ।

एसइईमा ३.६ जिपिए भन्दा बढी ल्याउने विद्यार्थीलाई सम्बन्धित पालिकाको सिफारिसको आधारमा मासिक शुल्कमा पूर्ण छुटको व्यवस्था गरिएको प्रिन्सिपल थापाको भनाइ छ ।  यो छात्रवृत्ति प्राप्त गर्ने विद्यार्थीले कक्षा ११ र १२ मा निःशुल्क रुपमा अध्ययन गर्न पाउनेछन् । 

रनिङ शिल्डमा पदक ल्याउनेलाई छुटै छुट

यसका साथै यस स्कुलले विभिन्न अतिरिक्त क्रियाकलापमा विजेता हुने विद्यार्थीलाई छुटको व्यवस्था गरेको छ । पालिका देखि राष्ट्रिय स्तरका रनिङ शिल्डमा प्रतियोगितामा पदक विजेता हुने विद्यार्थीलाई पदक अनुसार छुटको व्यवस्था गरिएको विद्यालयले जनाएको छ ।

प्रिन्सिपल थापाले स्वर्ण पदक विजेतालाई पूर्ण (सय प्रतिशत) छुट, रजत पदक विजेतालाई ५० प्रतिशत छुट र कास्यपदक विजेतालाई २५ प्रतिशत छुट गरिएको जानकारी दिनुभयो । यो छुट मासिक शुल्कमा लागू हुने गरी व्यवस्था गरिएको स्कुलले बताएको छ ।