आठबिसकोटमा शैक्षिक गुणस्तर सुधारका लागि क्षमता विकास गरिदै

रुकुम पश्चिमको आठबिसकोट नगरपालिकाले शैक्षिक गुणस्तर सुधारका लागि सरोकारवालाहरुको क्षमता विकास कार्यक्रम सुरु गरेको छ । नगरपालिकाको शिक्षा, युवा तथा खेलकुद शाखाले शैक्षिक गुणस्तर सुधारका लागि दुई दिने अभिमुखीकरण कार्यक्रम सुरु गरेको हो । 

कार्यक्रममा नगर प्रमुख, उप प्रमुख, वडा अध्यक्षहरु, नगरपालिका भित्र सञ्चालित सबै तहका सामुदायिक विद्यालयका प्रधानाध्यापक, विद्यालय व्यवस्थापन समितिका अध्यक्ष, नगर शिक्षा समितिका सदस्यहरुको सहभागिता रहेको छ । 

आठबिसकोट नगरपालिकाका निमित्त प्रमुख प्रशासकीय अधिकृत राजेश गौतमले शैक्षिक गुणस्तर सुधारका लागि सबै पक्षको क्षमता विकास गर्न र गुणस्तर अभिबृद्धि गर्न प्रेरित गर्ने उद्धेश्यले कार्यक्रम सञ्चालन गरिएको जानकारी दिनुभयो । गौतमका अनुसार विद्यालयको शैक्षिक अवस्था, भईरहेका राम्रा अभ्यास, समस्या तथा चुनौतीहरु, सम्भावनाहरु लगायतका बिषयमा विषय विज्ञको सहजीकरणमा अभिमुखीकरण चलाईएको छ । 

कार्यक्रमको मुख्य प्रशिक्षकको रुपमा चितवनस्थित नारायणी नमूना माविका पूर्व प्रधानाध्यापक पूर्ण प्रसाद दवाडी रहनु भएको छ । उहाँले विद्यालयलाई कसरी नमूना बनाउन सकिन्छ भन्ने बिषयमा आफूले गरेको काम र आठबिसकोटमा गर्न सकिने कामहरुको बारेमा प्रेरक ढंगले शेषण सहजीकरण गरिरहनु भएको छ । 

उक्त अवसरमा विभिन्न विद्यालयका प्रधानाध्यापकहरुले विद्यालयको शिक्षाको गुणस्तरको अवस्था, भईरहेका राम्रा कार्यहरु र समस्याहरुको बारेमा रिपोर्टिङ गर्नुभएको थियो । 

आठबिसकोट नगरपालिका प्रमुख रबि केसीले नगरपालिकाले शिक्षा क्षेत्रबाट स्पष्ट शैक्षिक विकासको कार्यदिशा निर्माण गरेर व्यवस्थित रुपमा शैक्षिक विकासका कार्यक्रम ल्याउन चाहेको बताउनुभयो । उहाँले शिक्षा क्षेत्रको स्पष्ट नीति, योजना, कार्यक्रम ल्याउन नगरपालिका प्रतिबद्ध रहेकोले गुणस्तर सुधारका लागि सबै पक्ष गम्भिर हुन आग्रह गर्नुभयो । 

नगर उपप्रमुख धनकुमारी शाहीले हरेक शिक्षालय नमूना बनाउन सबैले सक्दो कोशिस गर्नुपर्ने बताउनुभयो । शैक्षिक गुणस्तर सुधारका लागि आआफ्नो भूमिका मनन् गरेर व्यवहारिक रुपमा जिम्मेवारी कार्यान्वयन गर्न आवश्यक रहेको उहाँको भनाइ छ । 

कार्यक्रममा शिक्षा अधिकृत ईन्द्र बहादुर बिष्टले आठबिसकोट नगरपालिकाको शैक्षिक अवस्था, शैक्षिक गुणस्तर सुधारका लागि भईरहेका प्रयासहरु, समस्या तथा चुनौतीहरुको बारेमा प्रस्तुतीकरण राख्नु भएको थियो । 

नगरपालिकाले शैक्षिक गुणस्तर सुधारका लागि शिक्षक व्यवस्थापन, दिवा खाजा कार्यक्रम, किशोरीहरुको लागि सेनेटरी प्याड व्यवस्थापन, निशुल्क पाठ्यपुस्तक, छात्रबृत्ति प्रदान, राष्ट्रपति शैक्षिक सुधार कार्यक्रम, तालिम, विद्यालय अनुगमन, पढ्दै कमाउँदै कार्यक्रम लगायतका गतिविधिहरु सञ्चालन गरिरहेको जनाएको छ ।