आठबिसकोटमा एन-प्याफको एक करोड ६४ लाखको परियोजना समापन

रुकुम पश्चिम । नेपाल जनजागरण मञ्च (एन-प्याफ) ले फास्टेनएक्सन स्विजरल्याण्डको साझेदारीमा सञ्चालन गरेको 'सामुदायिक खाद्य सुरक्षा तथा सशक्तिकरण परियोजना'को समापन तथा हस्तान्तरण कार्यक्रम सम्पन्न गरिएको छ। 

आईतबार आठबिसकोट नगरपालिकाको सभा हलमा नगर प्रमुख रवि के.सी.को प्रमुख आतिथ्यता र नेपाल जनजागरण मञ्चका अध्यक्ष टेक बहादुर कुसारीको अध्यक्षतामा उक्त सम्पन्न गरिएको थियो ।

परियोजना संयोजक समिट रिजालले परियोजनाको उपलब्धि तथा गतिविधिबारे विस्तृत प्रस्तुति दिई सरोकारवालाहरूसँग अन्तरक्रिया गरे पश्चात संस्थाका अध्यक्ष कुसारीले परियोजनाको सम्पूर्ण विवरण समेटिएको हस्तान्तरण पुस्तिका औपचारिक रूपमा नगर प्रमुख के।सी।लाई प्रदान गर्नुभएको थियो ।

नगर प्रमुख के.सी.ले परियोजनाले नगरपालिकाको कृषि क्षेत्रमा पुर्याएको योगदानप्रति आभार प्रकट गर्दै यस्ता प्रयासहरूलाई स्थानिय सरकारबाट निरन्तरता दिइने प्रतिबद्धता जनाउनु भएको थियो । वडा नम्वर १ र २ का अध्यक्षहरूले परियोजनाको प्रभावकारी कार्यप्रति सन्तोष व्यक्त गर्दै भविष्यमा पनि यस्ता परियोजनामा सहकार्य गर्न इच्छुक रहेको र वडाले यस परियोजनाका उपलब्धि तथा क्रियाकलापहरुलाई निरन्तरता दिने प्रतिबद्धता व्यक्त गर्नुभएको थियो।

परियोजनाले अन्नबाली, तरकारी, फलफूल तथा डाले घाँसमा आधारित वातावरणमैत्री पर्यावरणीय कृषि अभ्यासलाई प्रवर्द्धन गर्दै खाद्य तथा पोषण सुरक्षामा महत्वपूर्ण योगदान पुर्याएको छ । परियोजनाबाट प्रत्यक्ष रुपमा ५६६ घरधुरिलाई लाभान्वित बनाएको छ । 

यस परियोजनाको कुल बजेट एक करोड ६४ लाख १७ हजार ९९३ रुपियाँ रहेको थियो भने परियोजनाको अवधि जनावरी २०२२ देखी जुन २०२५ सम्म रहेको थियो ।

परियोजना समापन तथा हस्तान्तरण कार्यक्रममा स्थानीय सरकारका प्रमुख तथा प्रतिनिधिहरु, क्रियाशील राजनैतिक दलका प्रतिनिधि, लाभग्राही, गैर सरकारी संघ संस्थाका प्रतिनिधि र अन्य सरोकारवालाहरुको सहभागिता रहेको थियो ।