रुकुम पश्चिमका ६ वटै पालिका पूर्णखोप सुनिश्चित घोषणा

रुकुम पश्चिमका ६ वटै पालिकालाई पूर्णखोप सुनिश्चितता र दिगोपना घोषणा गरिएको छ । 

बिहिबार जिल्लाको सानीभेरी गाउँपालिका पूर्णखोप सुनिश्चितता र दिगोपना पालिका घोषणा भएसँगै जिल्लाका सबै पालिका पूर्ण खोप सुनिश्चित घोषणा भएका हुन् । 

सानीभेरी गाउँपालिका अध्यक्ष बिर्खबहादुर बिष्टको अध्यक्षता र जिल्ला समन्वय समितिका कार्यवहाक प्रमुख देवबहादुर बिकको प्रमुख आतिथ्यतामा भएको एक कार्यक्रमका बिच आज सानीभेरीलाई पूर्ण खोप सुनिश्चितता तथा दिगोपना पालिका घोषणा गरिएको हो ।

स्वास्थ्य सेवा कार्यालय रुकुम पश्चिमका खोप सुपरभाईजर निरीक्षक कृष्णा खड्काले यस अघि जिल्लाको त्रिवेणी गाउँपालिका, बाँफिकोट गाउँपालिका, मुसिकोट नगरपालिका, आठबिसकोट नगरपालिका र चौरजहारी नगरपालिकालाई पूर्णखोप सुनिश्चितता र दिगोपना पालिका घोषणा गरिसकेको जानकारी दिनुभयो । 

खड्काले अब यसै आर्थिक वर्षभित्र जिल्लालाई पूर्णखोप सुनिश्चितता तथा दिगोपना जिल्ला घोषणा गर्ने कार्यक्रम रहेको बताउनुभयो । “स्थानीय स्रोतको उपयोग, स्वामित्व र सहभागिता : पूर्ण खोप सुनिश्चितता हाम्रो प्रतिबद्धता” भन्ने नाराका साथ पालिकालाई पूर्णखोप सुनिश्चतता तथा दिगोपना घोषणा गरिएको हो । 

६ वटै पालिकाका १६ महिनादेखि ५९ महिनासम्मका बालबालिकाले राष्ट्रिय खोप तालिका अनुसार पाउनुपर्ने सबै खोप पाएपछि पूर्णखोप सुनिश्चित पालिका घोषणा गरिएको स्वास्थ्य सेवा कार्यालयका व्यवस्थापक डा.महेश चौलागाईले जानकारी दिनुभयो । उहाँले राष्ट्रिय पूर्ण खोप निर्देशिका, २०७१ को तेस्रो संस्करण २०७७ बमोजिम सम्पूर्ण प्रक्रियाहरु पुरा गरेर पूर्ण खोप पालिका सुनिश्चितता तथा दिगोपना घोषणा गरिएको बताउनुभयो । 

पालिकाभित्र रहेका बालबालिकाले राष्ट्रिय खोप तालिका अनुसार खोप पाएपछि पालिकालाई पूर्णखोप सुनिश्चिता पालिका घोषणा गर्ने गरिन्छ । नगरप्रमुख तथा गाउँपालिका अध्यक्षको नेतृत्वमा रहेको पालिकास्तरीय खोप समन्वय समितिले स्वाथ्यकर्मीहरुको संलग्नतामा घरधुरी सर्वेक्षण तथा लगत संकलन गरी प्रमाणीकरण गरेपछि पालिकालाई पूर्णखोप सुनिश्चितता पालिका घोषणा गरिने प्रावधान रहेको छ । अब जिल्लालाई नै पूर्णखोप सुनिश्चितता तथा दिगोपना घोषणा गर्ने तयारी रहेको छ ।