विद्यालयमा दुना टपरी बनाउन सिकेपछि बालबालिका उत्साहित, अभिभावक खुसी

रुकुम पश्चिम । कक्षाकोठामा सधै किताबी ज्ञान घोक्ने बाँफिकोट गाउँपालिका -९ झुलाकी प्रेमीका केसी हिजोआज विद्यालयमा दुना टपरी बनाउने सीप सिक्नुहुन्छ । शिक्षकले व्यवहारीक रुपमा र साँझ घरमा थप प्रयास गरेपछि प्रेमीकाले चिटिक्कको दुना टपरी बनाउन जान्नुभएको छ ।   

झुलाका बसन्त दाहालले पनि विद्यालयमै दुना टपरी बनाउन सिक्नु भएको छ । आफैले बनाएको टपरी घरमा लिएर जाँदा परिवारमा सबै जना खुसी भएको बसन्तले बताउनुभयो । 

प्रेमीका र बसन्त जस्तै बाँफिकोट गाउँपालिका ९ झुलामा रहेको जनकल्याण माध्यमिक विद्यालय पुरानागाउँमा कक्षा सातमा पढ्ने २१ जना विद्यार्थीले दुना टपरी बनाउन सिकेका छन् । गाउँपालिकाले निर्माण गरेको स्थानीय ‘हाम्रो बाँफिकोट’ पुस्तकमा ‘दुना टपरी’ भन्ने पाठ रहेको छ । सोहि पाठ अन्तर्गत कक्षा शिक्षक सुनिता केसीले उनीहरुलाई दुना टपरी बनाउन सिकाउनुभएको हो । 

छात्रा प्रेमीकाले घरमा आमा फुपुहरुले टुना टपरी बनाएको देखेको मात्र भएपनि अब आफूले पनि बनाउन जानेको बताउनुभयो । विद्यालयमा रहरै रहरको वातावरणमा उक्त सीप सिक्न पाएको उहाँले जनाउनुभयो ।

विद्यालयका शिक्षक सुनिता केसीले कक्षामा विद्यार्थीहरुले उत्सुकताको साथ दुना टपरी बनाउन सिकेको बताउनुभयो । उहाँले विद्यार्थीहरुले कक्षामा बनाएको दुना टपरी घरमा देखाउँछु भन्दै खुसी भएर लैजाने र  घरमा गएर पनि टपरी अझै राम्रो बनाउँछु भनेर खुसी व्यक्त गरेको बताउनुभयो । अभिभावकहरु पनि आफ्नो बच्चाको सीप देखेर खुसी भएका छन् । 

घरमा, विवाहमा, पूजापाठ लगायतका सामाजिक कार्यमा समेत प्रयोगमा आउने स्थानीय उत्पादनमा आधारित सामाग्री आफै बनाउन जान्दा विद्यार्थीहरु व्यवहारिक बन्ने शिक्षक केसीले उल्लेख गर्नुभयो । किताबी ज्ञान मात्र भन्दा पनि व्यवहारिक ज्ञान आवश्यक रहेकोले गाउँपालिकाले तयार गरेको पाठ्क्रम प्रभावकारी रहेको उहाँको भनाई छ । 

विद्यालयका प्रधानाध्यापक धर्मसिंह केसीले अरु कक्षाको पाठ्यक्रममा पनि यस्ता खालका पाठहरु समावेश भएको बताउनुभयो । सबै विद्यालयमा यस्तै प्रकारको व्यवहारिक शिक्षा आवश्यक रहेको उहाँको भनाइ छ । प्रधानाध्यापक केसीले विद्यार्थीहरु किताबी ज्ञानमा मात्र सिमित हुनुहुँदैन भन्ने मान्यता रहेकोले प्रयोगात्मक रुपमै दुना टपरी बनाउन सिकाएको जनाउनुभयो । 

विद्यार्थीहरुले किताबमा रहेको पाठलाई व्यवहारमा लागु गर्दा स्मरणिय हुने जनाएका छन् । सैद्धान्तिक कुरालाई व्यवहारिक बनाउन जनकल्याण माविले जोड दिईरहेको छ ।