वातावरण दिवसको अवसरमा रुकुममा वृहत वृक्षारोपण

रुकुम पश्चिममा वृहत वृक्षारोपण कार्यक्रम गरिएको छ । विश्व वातावरण दिवसको अवसरमा डिभिजन वन कार्यालयले जिल्ला प्रशासन कार्यालय र चण्डीदल गणको समन्वयमा वृक्षारोपण कार्यक्रम सम्पन्न गरेको हो । 

दिवसको अवसर पारेर मुसिकोट नगरपालिका –१ सल्लेस्थित चण्डीदल गणको परिसरमा वृक्षारोपण गरेर कार्यक्रमको शुभारम्भ गरिएको हो भने जिल्लाका विभिन्न स्थानमा वृक्षारोपण गरिएको छ ।  

रुकुम जिल्ला अदालतका जिल्ला न्यायाधीस रामप्रसाद बस्यालले वृक्षारोपण गरेर कार्यक्रमको शुभारम्भ गर्नुभएको हो । यसका साथै प्रमुख जिल्ला अधिकारी कुल बहादुर जिसी, चण्डी दल गण सल्लेका गणपति शरद थापा, प्रहरी नायब उपरीक्षक प्रमेश बिष्ट, सशस्त्र प्रहरी नायब उपरीक्षक मदन धानुक, प्रमुख अनुसन्धान अधिकृत चिरञ्जिवी बुढा मगर, डिभिजन वन कार्यालयका प्रमुख दिनेश जंग खत्री, साझा मुराल अस्पताल प्रा.लि.का प्रबन्धक डा. दिपक पुन लगायतले वृक्षारोपण गर्नुभएको छ । 

डिभिजनल वन अधिकृत दिनेश जंग खत्रीका अनुसार दिवसको अवसरमा अवसरमा बिहिबार एक हजार ६ सय बढी विभिन्न जातका विरुवाहरु रोपिएको छ । सल्लेस्थित नेपाली सेनाको ब्यारेक परिसरका साथै वडा नम्वर २ स्थित बारीपोले सिद्ध साइकुमारी मन्दिर परिसरमा पनि एक सय बढी विरुवा रोपिएको छ । मन्दिर परिसरमा सेफ गार्डसहित वृक्षारोपण गरिएको डिभिजनल वन अधिकृत खत्रीले बताउनुभयो । 

मन्दिर परिसरमा भएको वृक्षारोपण कार्यक्रममा मुसिकोट नगरपालिका वडा नम्वर २ का वडा अध्यक्ष दिनेश खड्काले विरुवाको संरक्षणको दायित्व स्थानीय र वडा कार्यालयको रहेको बताउनुभयो । उहाँले प्रकृति बचाउन र हराभरा बनाउन हरेक डाँडा र खाली स्थानमा वृक्षारोपण गर्न आवश्यक रहेका समेत उल्लेख गर्नुभयो । 

डिभिजन वन कार्यालयका अनुसार सल्ला जातका ६ सय, चिउरी २५०, लप्सी २५०, कल्की १५०, बाँस १५०, बेल एक सय, मयुरपंखी ९५ र पारीजातका पाँच वटा विरुवा रोपिएको हो । 

दिवसकै अवसरमा चौरजहारी नगरपालिका –१ स्थित सहिद यज्ञश्वर बहुप्राविधिक शिक्षालयमा ५० वटा विरुवा वृक्षारोपणका लागि पठाईएको कार्यालयले जनाएको छ । यसका साथै दिवसको अवसरमा डिभिजन वन कार्यालय परिसर सरसफाई गरिएको छ ।

यस वर्ष ‘प्लाष्टिक प्रदूषण न्यूनीकरणः हाम्रो दायित्व नाराका साथ विश्वका विभिन्न मुलुकमा यो दिवस मनाइँदै छ । संयुक्त राष्ट्रसंघले आह्वान गरेबमोजिम सन् १९७३ देखि प्रत्येक वर्ष जुन ५ तारिखलाई विश्व वातावरण दिवसको रुपमा मनाउन थालिएको हो ।