जेठ ७ गते रुकुम पश्चिममा 'सिस्नुपानी'

हास्यव्यङ्ग्यको माध्यमबाट सामाजिक, राजनीतिक र सांस्कृतिक विषयमा जनचेतना फैलाउने सिस्नुपानी नेपालको टिम रुकुम पश्चिममा आउने भएको छ । 

कर्णाली सिस्नुपानी कार्यक्रम अन्तर्गत आगामी जेठ ७ गते रुकुम पश्चिममा सिस्नुपानी नेपालको टिम भव्य प्रस्तुती लिएर आउने पक्का भएको रुकुमेली वाङमय अधिष्ठानका सचिव पूर्ण ओलीले जानकारी दिनुभयो । 

ट्रान्सपरेन्सी इन्टरनेशनल नेपालसँगको सहकार्यमा हुने यस कार्यक्रमको समन्वय मुसिकोट नगरपालिका र सहजिकरण जिल्ला प्रशासन कार्यालय र राप्ती साहित्य परिषद् जिल्ला शाखा रुकुम पश्चिमले गर्ने बताईएको छ।

सिस्‍नुपानी नेपाल मूलतः नेपाली साहित्य, कला संरक्षण र प्रवर्द्धन गर्न खोलिएको एक प्रतिष्ठित संस्था हो। खास गरी हास्यव्यङ्ग्यको माध्यमबाट सामाजिक, राजनीतिक र सांस्कृतिक विषयमा जनचेतना फैलाउने मुख्य उद्देश्य रहेको यस संस्थाले देशमा भ्रष्टाचारको उन्मूलन र सुशासन स्थापनाको लागि सरोकारवालाहरूलाई घचघच्याउने गरेको छ । यस संस्थाले देउसी भैलो, गाईजात्रा, कुशेऔँसीजस्ता पर्वहरूमा सन्देशमूलक कार्यक्रमहरू सञ्चालन गर्दै आएको छ ।

ख्यातिप्राप्त हास्यव्यङ्ग्य क्षेत्रका कलाकारहरू रुकुम पश्चिममा आउँने अधिष्ठानका सचिव ओलीले बताउनुभयो ।

कार्यक्रममा सिस्नुपानी नेपालका अध्यक्ष लक्ष्मण गाम्नागे, उपाध्यक्षत्रय मनोज गजुरेल, अर्जुन पराजुली, धिरेन्द्र प्रेमर्षि, महासचिव टङ्कराज आचार्य, सहसचिव सरोज घिमिरे, सदस्यद्वय शिशिर योगी र चक्र दवाडी, ट्रान्सपेरेन्सी इन्टरनेशनल नेपालका अध्यक्ष मदन शर्मा र संयोजक विनोद भट्टराई उपस्थित हुनुहुने कार्यक्रम रहेको छ । 

यही जेठ ७ गते दिउँसो १ बजेदेखि मुसिकोट नगरपालिका ५ स्थित शहिद प्रतिष्ठानको हल सेरीगाउँमा उक्त  कार्यक्रम हुने सुनिश्चित भएको ओलीले जनाउनुभयो । उक्त दिनको प्रस्तुतिहरु निशुल्क हेर्न सकिने व्यवस्था गरिएको छ ।